दीपक थापा , नेपाल प्रहरीको ३१औं महानिरीक्षक

काठमाडौं — नेपाल प्रहरीको ३१औं महानिरीक्षक (आईजीपी) पदमा दीपक थापा नियुक्त भएका छन्। सोमबार साँझ बसेको मन्त्रिपरिषद् बैठकले उनलाई प्रहरी प्रमुखको जिम्मेवारी सुम्पिएको हो। थापा यसअघि प्रहरी अतिरिक्त महानिरीक्षक (एआईजी) का रूपमा केन्द्रीय अनुसन्धान ब्युरो (सीआईबी) को नेतृत्व गर्दै आएका थिए।

यस नियुक्ति वसन्त कुँवरको अवकाशपछि भएको हो। कुँवरले अनिवार्य अवकाश पाउने समय पुगेपछि सोमबार नै प्रहरी सेवा छोडेका थिए। उनी २०७९ चैत १० गते नेपाल प्रहरीको ३०औं महानिरीक्षक बनेका थिए। प्रहरी सेवामा उनले ३० वर्ष पूरा गरेका थिए, जसको यात्रा २०५१ चैत ५ गतेदेखि सुरु भएको थियो।

गृह मन्त्रालयले सोमबार साँझ नै कुँवरलाई औपचारिक रूपमा बिदाइ गरिसकेको छ। कुँवरका ब्याचमेट एआईजी टेकप्रसाद राई, बुद्धिराज गुरूङ, दुर्गा सिंह, कुवेर कडायत, र जनक भट्टराई पनि अवकाशमा जानेछन्। भट्टराईले केही समयअघि मात्र एआईजी पद प्राप्त गरेका थिए। त्यस्तै, डीआईजी ध्रुव राउत, भोला रावल, र गणेश चन्द पनि अवकाशप्राप्त भएका छन्।

नवनियुक्त आईजीपी थापाले २०५२ साल भदौ १९ गते प्रहरी सेवामा इन्स्पेक्टरका रूपमा प्रवेश गरेका थिए। उनी २०६३ भदौ ८ गते डीएसपी, २०७२ साउन ८ गते एसपी, २०७५ फागुन ६ गते एसएसपी, २०७९ असार १७ गते डीआईजी, र २०७९ चैत ६ गते एआईजी बनेका थिए।

आईजीपी पदका लागि तीन जना एआईजी प्रतिस्पर्धामा थिए। थापा, राष्ट्रिय प्रहरी प्रशिक्षण प्रतिष्ठानका प्रमुख सुदिप गिरी, र काठमाडौं उपत्यका प्रहरी कार्यालय रानीपोखरीका प्रमुख टेकबहादुर तामाङ यो दौडमा थिए। कार्यदक्षता, कार्यसम्पादन र ज्येष्ठताको आधारमा थापा अगाडि रहेकाले उनी आईजीपी पदमा चयन भएका हुन्। उनकाे कार्यकाल २०८२ भदौ १८ सम्म, करिब ६ महिना रहनेछ।