काठमाडौं, अप्रिल ३, २०२५ – २०२४ को अन्त्यतिर भएका ठूलो प्राकृतिक विपत्तिहरूको बाबजुद नेपालको अर्थतन्त्र २०२५ आर्थिक वर्षमा ४.५ प्रतिशतले वृद्धि हुने अनुमान गरिएको छ, जुन २०२४ आर्थिक वर्षको ३.९ प्रतिशत वृद्धिदरभन्दा बढी हो। विश्व बैंकले आज सार्वजनिक गरेको नेपाल विकास अपडेट: सहनशीलता उपयोग गर्दै सुधार कार्यान्वयन गरी आर्थिक वृद्धि प्रवर्द्धन प्रतिवेदनअनुसार आन्तरिक व्यापार, जलविद्युत उत्पादन र धान उत्पादनमा वृद्धि हुनु यस वृद्धिको मुख्य कारण हुनेछ।
प्रतिवेदनअनुसार नेपालको अर्थतन्त्र २०२६ र २०२७ आर्थिक वर्षहरूमा वार्षिक औसत ५.४ प्रतिशत दरले वृद्धि गर्ने अनुमान गरिएको छ, जसको प्रमुख योगदान सेवा क्षेत्रले गर्नेछ।
“नेपाललाई आवश्यक रोजगारी सिर्जना गर्न निजी क्षेत्रद्वारा प्रवर्द्धित आर्थिक वृद्धिलाई बढावा दिनु महत्त्वपूर्ण छ। यसका लागि, नेपालले आफ्नो सहनशील आर्थिक वृद्धिको इतिहासलाई मजबुत बनाउँदै संरचनात्मक सुधारहरू कार्यान्वयन गर्नुपर्छ,” माल्दिभ्स, नेपाल, र श्रीलंकाका लागि विश्व बैंकका कन्ट्री डिभिजन डाइरेक्टर डेविड सिस्लेनले भने।
प्रतिवेदनमा नेपालको आर्थिक दृष्टिकोणप्रति केही चुनौतीहरू पनि औंल्याइएको छ। भूराजनीतिक अस्थिरता र व्यापारसँग सम्बन्धित अनिश्चितता, नेपालको वित्तीय क्षेत्रमा सम्पत्तिको गुणस्तर खस्किने सम्भावना, सरकारमा बारम्बार हुने प्रशासनिक परिवर्तनबाट नीतिगत अस्थिरता सिर्जना हुने जोखिम, तथा पूँजीगत खर्च बजेटको कार्यान्वयनमा हुने ढिलाइ प्रमुख जोखिमहरू हुन्।
“नेपाल विकास अपडेटले हालैका आर्थिक घटनाक्रमहरूको मूल्यवान् विश्लेषण प्रस्तुत गर्दै नेपालको सहनशील आर्थिक वृद्धिलाई उजागर गर्छ। देशको १६औं योजनाका लक्ष्यहरू हासिल गर्न आर्थिक वृद्धिलाई अझ प्रवर्द्धन गर्न पूँजीगत बजेटको प्रभावकारी कार्यान्वयन र चलिरहेका परियोजनाहरूको समयमा सम्पन्न गर्न आवश्यक छ,” राष्ट्रिय योजना आयोगका उपाध्यक्ष प्रा. डा. शिवराज अधिकारीले भने।