लन्डन / नेपाली दूतावासले बेलायतमा अध्ययनरत नेपाली विद्यार्थीहरूलाई सम्भावित ठगीको शिकार नबन्न सतर्क रहन आग्रह गरेको छ।
शुक्रबार साँझ जारी गरिएको एक वक्तव्यमा, लन्डनस्थित दूतावासले बेलायतका विभिन्न विश्वविद्यालयहरूमा उच्च शिक्षा हासिल गर्न चाहने नेपाली विद्यार्थीहरूलाई एजेन्टहरू मार्फत ठगी गर्ने घटनाहरूबारे गम्भीर ध्यानाकर्षण भएको जनाएको छ।
“नेपाली विद्यार्थीहरू दशकौंदेखि बेलायतका विश्वविद्यालय र कलेजहरूमा अध्ययन गर्न आइरहेका छन्, र यो प्रवृत्ति निरन्तर छ,” वक्तव्यमा भनिएको छ, “तर अध्ययनको व्यवस्था गर्ने वाचा गर्दै विद्यार्थीहरूलाई ठग्नु निन्दनीय तथा गैरकानुनी कार्य हो।”
दूतावासले यस्तो ठगी गर्नेहरूमाथि कारबाही गर्न नेपाल र बेलायतका सम्बन्धित निकायहरूसँग समन्वय भइरहेको जानकारी दिएको छ। साथै, विद्यार्थीहरूलाई सचेत रहन र ठगीबाट बच्न आवश्यक सतर्कता अपनाउन अनुरोध गरिएको छ।
“विद्यार्थीहरूले आफूले रोजेको विश्वविद्यालय वा कलेज मान्यता प्राप्त छ वा छैन भन्ने सुनिश्चित गर्नुपर्छ। साथै, शुल्क संरचना, भर्ना प्रक्रिया, र अन्य सम्बन्धित विषयहरूबारे पर्याप्त जानकारी लिनुपर्छ,” दूतावासको वक्तव्यमा उल्लेख गरिएको छ।
