लण्डन | वन तथा वातावरणमन्त्री ऐनबहादुर शाही ठकुरीले जलवायु परिवर्तनका कारण नेपालले ठूलो असर बेहोर्नु परिरहेको तथ्य प्रस्तुत गर्दै यसको प्रभाव न्यूनीकरण गर्न बाह्य सहायता आवश्यक रहेको बताएका छन्।
लण्डनस्थित नेपाली दूतावासले शुक्रबार साँझ मन्त्री ठकुरीको सम्मानमा आयोजना गरेको स्वागत कार्यक्रममा उनले नेपालका प्रमुख क्षेत्रहरू, जस्तै कृषि र पर्यटन, जलवायु परिवर्तनबाट प्रभावित भएको उल्लेख गर्दै यस समस्याको समाधानका लागि संयुक्त अधिराज्य (युके) जस्ता विकास साझेदारहरूको सहकार्य आवश्यक रहेको बताए।
जलवायु परिवर्तनको असर न्यूनीकरण र जैविक विविधता संरक्षण नेपाल मात्र होइन, वैश्विक चिन्ताको विषय भएको भन्दै उनले नेपाल-युके सम्बन्धलाई अझ सुदृढ गर्न आवश्यक रहेकोमा जोड दिए।
मन्त्री ठकुरीका अनुसार गोर्खा सैनिक बलका कारण नेपाल-युके सम्बन्ध ऐतिहासिक रूपमा घनिष्ठ रहँदै आएको छ। नेपाल सरकारले हालै जारी गरेको अध्यादेशले विदेशी लगानीलाई प्रोत्साहित गर्ने बताए। साथै, नेपालका अन्य कानुनहरू पनि लगानीमैत्री रहेको उल्लेख गर्दै उनले बेलायतमा रहेका नेपाली मूलका नागरिकहरूलाई ‘आमाको भूमि’ नेपालमा औद्योगिक विकासका लागि पूँजी परिचालनमा सक्रिय भूमिका खेल्न आग्रह गरे।
सोही कार्यक्रममा नेपालका लागि बेलायतका राजदूत चन्द्र कुमार घिमिरेले नेपाल र युकेबीचको शताब्दीयौँ पुरानो कूटनीतिक सम्बन्धबारे चर्चा गर्दै दुवै देश परस्पर लाभ र हित प्रवर्द्धन गर्न प्रतिबद्ध रहेको बताए।
मन्त्री ठकुरी जलवायु परिवर्तनसम्बन्धी कार्यक्रममा सहभागी भई बेलायत भ्रमण सकेर नेपाल फर्किएका छन्। यस क्रममा उनले बेलायतका राजा चार्ल्ससँग भेटवार्ता समेत गरेका थिए।