लन्डन / नेपाली फिल्म प्रवर्द्धनका लागि बिगतमा दुई पटक सफलतापूर्वक फिल्म महोत्सव सम्पन्न गरिसकेको थर्ड आईले यो वर्ष पनि बेलायतमा तेस्रो नेपाली फिल्म महोत्सव आयोजना गर्ने भएको छ।
आइतबार लन्डनको वोस्टर म्यानरस्थित नेपाल रेष्टुरेन्टमा आयोजित पत्रकार सम्मेलनमा आयोजक संस्थाले आउँदो मे महिनाको अन्तिम साता महोत्सव गर्ने घोषणा गरेको हो।
थर्ड आईका संस्थापक तथा निर्देशक विकास देवकोटाले नेपाली चलचित्रलाई अन्तर्राष्ट्रिय स्तरमा प्रवर्द्धन गर्ने उद्देश्यले यो महोत्सव आयोजना गर्न लागिएको बताए। उनले सन् २०२४ जनवरीदेखि डिसेम्बरसम्म निर्माण भएका चलचित्रहरूबाट उत्कृष्ट पाँच वटा फिल्म छनोट गरी प्रदर्शन गरिने जानकारी गराए।
समापन समारोह ३१ मेमा लन्डनको ग्रीनफोर्ड टाउन हलमा आयोजना गरिने तय गरिएको छ। अन्य स्थान र मितिहरू भने आयोजकले थप जानकारी दिनेछ।
यस पटक नेपालबाट चर्चित तथा नयाँ कलाकार तथा फिल्मकर्मीहरू महोत्सवमा सहभागी हुनेछन् भने बेलायतमै रहेका नेपाली फिल्मकर्मीहरूको पनि उपस्थिति रहनेछ।
फिल्म छनोट नेपालमा गठन गरिएको जुरीले नै गर्ने भएकाले महोत्सव निष्पक्ष र विवादरहित रहने देवकोटाले स्पष्ट पारे। उनले महोत्सवलाई कुनै पनि विकृति तथा मानव तस्करी जस्ता गलत गतिविधिबाट टाढा राख्न आफूहरू सचेत रहेको बताए।
पत्रकार सम्मेलनमा प्रोजेक्ट लिडर ओजेश सिंह र साझेदारी संयोजक तथा समाजसेवी सुनिल खड्काले विदेशमा रहेका नेपालीहरूले आफ्नो कला, संस्कृति, भाषा र साहित्यको प्रवर्द्धन गर्न महोत्सवलाई सफल बनाउन आग्रह गरे।
मिडिया संयोजक प्रजेश श्रेष्ठले फिल्म आवेदन प्रक्रिया खुलिसकेको जानकारी गराउँदै इच्छुकहरूले आउँदो २५ मार्चसम्म FilmFreeway.com तथा FilmFestivalLondon.co.uk मार्फत आवेदन दिन सक्ने बताए।
फिल्म महोत्सव आयोजक समितिमा अनिल बस्नेत, सुवसिंह गुरुङ, रोमियन लिम्बु, प्रशान्त खड्का, रविन भारती लगायत संलग्न छन्।