‘यती घर’ निर्माणलाई पहिलो प्राथमिकतामा राख्ने
लन्डन । यती नेपाली एसोसिएसन यूकेको अध्यक्ष पदमा टंक भट्टराई सर्वसम्मत रूपमा निर्वाचित भएका छन्। साउथ ह्यारोस्थित ह्यारो बरो फुटबल क्लबमा आइतबार, मे ४ मा सम्पन्न संस्थाको ३१औं अधिवेशनले भट्टराईको नेतृत्वमा नयाँ कार्यसमिति चयन गरेको हो।
यसअघि महासचिवको जिम्मेवारी सम्हालिरहेका भट्टराईले संस्थालाई आधुनिक युगअनुसार अघि बढाउने प्रतिबद्धतासहित अध्यक्ष पदमा उम्मेदवारी दिएका थिए।
नवगठित कार्यसमितिमा वसन्त राय क्षेत्री वरिष्ठ उपाध्यक्ष, राज पाण्डे उपाध्यक्ष, आशिषराज पन्त महासचिव, सुष्मा पौडेल उपमहासचिव, मणीकला राई गुरुङ कोषाध्यक्ष, हरि रेग्मी खेलकुद सचिव, क्षमता ढकाल सामाजिक सचिव, गोपाल बस्नेत सांस्कृतिक सचिव, र आशिष महर्जन प्रकाशन सचिवको जिम्मेवारीमा निर्वाचित भएका छन्।
सदस्यहरूमा जेनिस गिरी, रश्मी सिंह राणा, प्रशान्त खड्का, लक्ष्मण पाण्डे, सुरेश कुमार राई, टंकबहादुर गुरुङ र रुक्मिणी थापा निर्विरोध चयन भएका छन्।
निर्वाचन समितिको संयोजकमा संस्थाका पूर्व अध्यक्ष उमेशराज मोक्तान रहेका थिए भने सदस्यहरूमा शशीधर नेपाल, राजन खकुराल र शंकरप्रसाद दाहाल सहभागी थिए।
टंक भट्टराई: युवा नेतृत्वमा भरोसा
भट्टराई बेलायतमा स्थापित केयर व्यवसायी तथा सामाजिक अभियन्ता हुन्। उनले सयौं नेपालीलाई रोजगारी दिने अवसर सृजना गरेका छन्।
अध्यक्षमा निर्वाचित भएसँगै भट्टराईले यती संस्थाको गौरवशाली इतिहासलाई निरन्तरता दिँदै ‘यती घर’ निर्माणलाई पहिलो प्राथमिकतामा राख्ने बताएका छन्। साथै, क्षेत्रीय प्रतिनिधिमार्फत संस्थालाई थप सशक्त बनाउने योजना पनि उनले सार्वजनिक गरेका छन्।
उनले संस्थाको नेतृत्व युवा पुस्तालाई सुम्पिएकोमा अग्रजहरू र सम्पूर्ण सहयोगीप्रति आभार व्यक्त गरेका छन्।
भट्टराई कोडेक यूकेका पूर्व महासचिव र अध्यक्ष समेत भइसकेका अनुभवी नेतृत्वकर्ता हुन्।