लण्डन। नेपाल कम्युनिष्ट पार्टी (एमाले) का महासचिव शंकर पोखरेल पार्टीसँग आबद्ध प्रवासी नेपाली मञ्च (ओएनएफ) यूकेको नवौं अधिवेशनमा सहभागी हुन बेलायत आउन लागेका छन्।
महासचिव पोखरेल आगामी १२ जुनमा यूरोपमार्फत बेलायत आउने कार्यक्रम तय भएको छ। उनी अधिवेशनका प्रमुख अतिथि रहनेछन् भने अधिवेशन यही जुन १५ मा लेस्टरमा सम्पन्न हुने तय भएको छ। अधिवेशनले आगामी तीन वर्षको लागि नयाँ नेतृत्व चयन गर्नेछ।
ओएनएफ यूकेको अधिवेशनमा एमाले युरोप इन्चार्ज घनश्याम पाण्डे, प्रवासी नेपाली अन्तर्राष्ट्रिय मञ्चका अध्यक्ष संजय थापा तथा अन्तर्राष्ट्रिय समितिका सचिवालय सदस्य प्रभु थापासहितका नेताहरुको पनि सहभागिता रहनेछ।
बेलायत भ्रमणको क्रममा महासचिव पोखरेल नेपाली दूतावास लण्डनले आयोजना गर्ने विभिन्न कार्यक्रममा सहभागी हुनेछन्। साथै, नेपाल–बेलायत दौत्य सम्बन्ध, व्यापार, लगानी र पर्यटन प्रवर्द्धनसम्बन्धी कार्यक्रमहरूमा समेत उनको सक्रिय उपस्थिति रहनेछ।
यस्तै, उनले बेलायती सरकारी अधिकारी र राजनीतिक दलका प्रतिनिधिहरूसँग भेटघाट गरी दुई देशबीचको सम्बन्धलाई थप सुदृढ बनाउने प्रयास गर्ने कार्यक्रम तय भएको छ। साथै, लण्डनस्थित हाईगेटमा रहेको कार्ल मार्क्सको समाधिमा पुष्पगुच्छा अर्पण गरेपछि स्थानीय नेपाली समुदायसँग भेटघाट तथा अन्तरक्रिया गर्ने कार्यक्रम पनि रहेको छ। यस अवसरमा पूर्व गोर्खा सैनिकका अधिकार, गैरआवासीय नेपाली नागरिकता लगायतका सरोकारका विषयमा छलफल हुने बताइएको छ।
बेलायत आउनुअघि पोखरेलले काठमाडौंस्थित बेलायती दूतावासमा राजदूत रोब फेनसँग भेट गरी भ्रमणको उद्देश्य र दुई देशबीचको चासोका विषयमा कुराकानी गरेका थिए। ओएनएफ यूकेका अध्यक्ष तुंगभद्र भुसालले महासचिव पोखरेलको स्वागतका लागि सम्पूर्ण तयारी पूरा भइसकेको जानकारी दिएका छन्।