लन्डन – नेपाली राजदूतावास लन्डनमा बिहीबार साँझ १८औं गणतन्त्र दिवस भव्य रूपमा मनाइएको छ।
समारोहमा नेपालका रक्षा सचिव रामेश्वर दंगाल, ननिटनका मेयर भीम सारु, काउन्सिलर रोजिना प्रधान राई, पूर्व मिस नेपाल तथा नायिका निती शाह, स्वामी डा। योगी विकासानन्द लगायत बेलायतका विभिन्न स्थानबाट नेपाली समुदायका अगुवाहरू उपस्थिति थिए।
बेलायतका लागि नेपाली राजदूत चन्द्र कुमार घिमिरेले कार्यक्रमलाई सम्बोधन गर्दै गणतन्त्र प्राप्तिमा योगदान दिने शहीदप्रति श्रद्धाञ्जली अर्पण गरे। उनले आफ्नो साढे चार महिनाको कार्यकालमा दूतावासमार्फत भएका उपलब्धिहरू उल्लेख गरे—व्यापार लगानी सम्मेलन, गोर्खा मामिलामा छलफल, र न्यायिक सहकार्य सम्झौता।
राजदूत घिमिरेले आगामी दिनमा स्कटल्याण्डमा नेपाली मेला, पर्यटन प्रवर्धन कार्यक्रम र प्रविधि सम्मेलन आयोजना गर्ने योजनाबारे जानकारी दिए। साथै, बेलायतमा नेपाली संघसंस्थाहरूबीच बलियो सहकार्य भए छिटो प्रगति सम्भव हुने विश्वास व्यक्त गरे।
नयाँ राजदूत नियुक्तिपछिको यो कार्यक्रममा नेपाली समुदायका अधिकांश परिचित अनुहारहरूलाई मात्रै आमन्त्रित गरिएको देखियो, जसले आम नेपाली समुदायको प्रतिनिधित्वको सवालमा केही चासोहरू उठाएका छन्।
