गोर्खा कप २०२५: ड्रिम टिमको ऐतिहासिक जित, नेपाली संस्कृति र खेलकुदको भव्य उत्सव सम्पन्न

दिनेशकुमार , लन्डन — बेलायतको अल्डरसटस्थित क्विन्स एभिन्यू स्पोर्ट्स मैदानमा सम्पन्न २३औं गोर्खा कप फुटबल प्रतियोगिता नेपाली समुदायबीच भव्य उत्सवको रुपमा सम्पन्न भएको छ। प्रतियोगितामा ड्रिम टिम ले शानदार प्रदर्शन गर्दै गुरुजी इलाइट टिमलाई पराजित गर्दै मेन क्याटेगोरीको उपाधि हात पार्‍यो।

झण्डै १५ हजार दर्शकको उपस्थितिमा सम्पन्न गोर्खा कप केवल खेलकुदको प्रतिस्पर्धा मात्र नभई नेपाली कला, संस्कृति, खानपान, र पहिचान झल्काउने उत्सवको रुपमा परिणत भयो।

फुटबलमा उत्कृष्ट प्रदर्शन

मेन क्याटेगोरीतर्फ ड्रिम टिमले गुरुजी इलाइटलाई पराजित गर्दै £३,००० नगद, ट्रफी र प्रमाणपत्र जितेको हो। उपविजेता गुरुजी इलाइटले £१,८०० नगदसहित ट्रफी र प्रमाणपत्र प्राप्त गर्‍यो।

• प्लेयर अफ दि म्याच: ईश्वर गुरुङ (ड्रिम टिम)

• टप स्कोरर: रोबेल नाल्बो (गुरुजी इलाइट)

• बेस्ट म्यानेजर: शक्थिम चेम्जोङ (ड्रिम टिम)

भेट्रान क्याटेगोरी

भेट्रान समूहमा हिमालयन एफसी विजेता बनेको छ भने इन्टेक २००० उपविजेता बन्यो।

• विजेताले: £१,५००

• उपविजेताले: £१,०००

• टप स्कोरर: डा. सन्दिप गुरुङ (हिमालयन एफसी)

• प्लेयर अफ दि म्याच: खुम गुरुङ (हिमालयन एफसी)

• बेस्ट म्यानेजर: कुमार थापा (हिमालयन एफसी)

महिला क्याटेगोरी

महिला खेलमा रन्डरबोल्ट एफसी विजेता बन्यो भने तामाङ समाज युके उपविजेता बन्यो।

• विजेताले: £६००

• उपविजेताले: £४००

• प्लेयर अफ दि म्याच: गरिमा राई

विशेष सम्मान

यो वर्षको “फुटबल लेजेन्ड अफ गोर्खा कप” उपाधि लोकप्रसाद चेम्जोङ (धनकुटे) लाई प्रदान गरिएको छ। उनले गोर्खा कपमा १३ पटक भाग लिई तीनपटक उपविजेता बनेका थिए। साथै हङकङमा समेत नेपाली टिमबाट खेलेका थिए।

सांस्कृतिक र सामाजिक विविधता

प्रतियोगितामा नेपाली सांस्कृतिक नृत्य, झाँकी, दर्जनौँ स्टल, स्वादिला नेपाली परिकार, स्वास्थ्य शिविर, व्यापारिक र सामाजिक संस्थाहरुको सहभागिता देखिएको थियो।

कार्यक्रममा नेपाली राष्ट्रिय महिला टिमकी सावित्रा भण्डारी ‘साम्बा’, नेपाली राजदूत चन्द्रप्रसाद घिमिरे, रस्मुर बरो काउन्सिलका मेयर, बेलायती सांसद एलेक्स बेकर, गिनिज बुक होल्डर साजन डंगोल, र अन्य विशिष्ट व्यक्तिहरूले पुरस्कार वितरण गरे।

आयोजनामा तमुधिं यूकेको भूमिका

तमुधिं यूकेद्वारा आयोजित प्रतियोगिता खेलकुद सचिव क्याप्टेन दीपक घलेको संयोजकत्वमा सम्पन्न भयो। यस वर्ष ३२ मेन, १६ भेट्रान र २ महिला टिम गरी कुल ५० टिम सहभागी भएका थिए।

गोर्खा कप २०२५ ले नेपाली पहिचान, एकता र प्रतिभालाई प्रवर्द्धन गर्ने अन्तर्राष्ट्रिय मञ्च बनेको छ। आयोजकले आगामी वर्षहरूमा अझ भव्यता थप्ने प्रतिबद्धता जनाएका छन्।