काठमाण्डौं । ‘जेनजी’ पुस्ताले आयोजना गरेको शान्तिपूर्ण प्रदर्शनमा सरकारको अत्यधिक बल प्रयोगका कारण सोमबारको घटनामा १९ जनाको मृत्यु भएको छ भने ४२२ जना घाइते भएका छन्। प्रहरीको गोली र लाठीचार्जका कारण मृतक तथा घाइतेको संख्या बढ्दै गएपछि देशभरै तनाव चुलिएको छ।
घटनाप्रति नैतिक जिम्मेवारी लिंदै गृहमन्त्री रमेश लेखकले पदबाट राजीनामा दिएका छन्। उनले हिंसात्मक दमन रोक्न नसकेको स्वीकार गर्दै आफूले जिम्मेवारी लिनुपर्ने बताएका हुन्।
यसबीच, सञ्चारमन्त्रीपृथ्वी सुव्वा गुरुंगले प्रधानमन्त्री हाल राजीनामा नदिने स्पष्ट पारेका छन्। उनले राजनीतिक संवादमार्फत समस्याको समाधान खोजिने बताएका छन्।
जेनजी आन्दोलन भ्रष्टाचारको विरोध, सुशासनको माग र सामाजिक सञ्जालमा लगाइएको प्रतिबन्धविरुद्ध देशभरि फैलिँदै गएको छ। शान्तिपूर्ण प्रदर्शनमा भएको दमनले सरकार गम्भीर संकटमा परेको विश्लेषण गरिन्छ।
