लण्डन / नेपालमा ‘जेन–जेड’ पुस्ताद्वारा आयोजित शान्तिपूर्ण प्रदर्शनका क्रममा भएको हिंसात्मक घटनाप्रति गैरआवासीय नेपाली संघ (एनआरएनए) यूके र अन्तर्राष्ट्रिय समन्वय परिषद्ले गहिरो दुख व्यक्त गरेका छन्।
प्रदर्शनमा प्रहरीले चलाएको गोलीका कारण हालसम्म १९ जनाको मृत्यु र ३४७ जना घाइते भएको तथ्यप्रति संघले गम्भीर ध्यानाकर्षण गराउँदै मृतकप्रति श्रद्धाञ्जली, परिवारजनप्रति समवेदना र घाइतेहरूको शीघ्र स्वास्थ्य लाभको कामना गरेको छ।
एनआरएनएले अभिव्यक्ति स्वतन्त्रता, शान्तिपूर्ण आन्दोलन र मानव अधिकारलाई सम्मान गर्न सरकारसँग आग्रह गर्दै मृतक परिवारलाई राहत तथा क्षतिपूर्ति, घाइतेको निशुल्क उपचार, घटनाको निष्पक्ष अनुसन्धान र दोषीमाथि कारबाहीको माग गरेको छ।
संघले आन्दोलनलाई बदनाम गर्ने तत्वहरूप्रति सतर्क रहन र युवाहरूको स्वस्फूर्त आन्दोलनलाई राजनीतिक स्वार्थमा प्रयोग नगर्न सबै पक्षलाई आह्वान गरेको छ।
