लन्डन – नेपाल महिला राष्ट्रिय फुटबल टोलीकी स्टार स्ट्राइकर सावित्रा भण्डारी ‘साम्बा’ भोलि (२५ मे आइतबार) आयोजना हुन लागेको २३औं गोर्खा कप फुटबल प्रतियोगितामा सहभागी हुन लन्डन आइपुगेकी छन्।
आयोजक तमुधिं यूकेका अनुसार गोर्खा कपको सम्पूर्ण तयारी सकिएको छ र प्रतियोगिता निर्धारित कार्यक्रम अनुसार भोलि बिहान ९:३० बजेदेखि अल्डरसटस्थित क्विन्स एभिन्यू मैदानमा सुरु हुनेछ। प्रतियोगिता साँझ ८ बजेसम्म सञ्चालन हुनेछ।
साम्बाको आगमनले प्रतियोगिताको उत्साह थप बढेको आयोजकले बताएका छन्। युरोपमा अनुबन्धित भएर खेल्ने पहिलो नेपाली महिला फुटबलरको रूपमा परिचित साम्बाले उपस्थित दर्शकहरूलाई प्रेरित गर्ने विश्वास गरिएको छ।
प्रतियोगितामा मुख्य पुरुष फुटबलतर्फ ३२ टिम, भेट्रानतर्फ १६ टिम र महिलातर्फ २ टिमले प्रतिस्पर्धा गर्ने छन्। विजेता र उपविजेताहरूलाई आकर्षक नगद पुरस्कार, ट्रफी र प्रमाणपत्र प्रदान गरिनेछ।
कार्यक्रममा प्यारासुट डिस्प्ले, गोरखा घले, इंग्ल्यान्डका खेलाडीहरू, तथा नेपाली सांस्कृतिक नृत्य तथा संगीत कार्यक्रमको समेत समावेश गरिनेछ। साथै दन्त परीक्षणसहितको स्वास्थ्य शिविर पनि सञ्चालन गरिनेछ।
प्रतियोगिता स्थलमा १०३ वटा स्टल, FA ट्रफीकप विजेता अल्डरसट टाउन फुटबल क्लबको ट्रफी प्रदर्शन, र ‘लिजेन्ड अफ द फुटबल’ सम्मानजस्ता विशेष कार्यक्रमहरू पनि रहने छन्।
प्रवेश शुल्क ५ पाउण्ड, पार्किङ शुल्क ५ पाउण्ड तोकिएको छ भने १२ वर्ष मुनिका लागि निःशुल्क प्रवेशको व्यवस्था गरिएको छ। आयोजकले १५ देखि २० हजार दर्शक सहभागिताको अपेक्षा गरेका छन्।
तमुधिं यूकेका अध्यक्ष जुमकाजी गुरुङले सम्पूर्ण नेपाली समुदायलाई कार्यक्रममा सहभागिता जनाई खेलकुद र संस्कृति दुवैलाई साथ दिन आह्वान गरेका छन्।