दिनेश कुमार , लन्डन – नेपाली कला, संस्कृति र चलचित्रको अन्तर्राष्ट्रिय प्रवर्द्धन गर्ने उद्देश्यले आयोजना गरिएको तेस्रो नेपाली फिल्म फेस्टिभल यूके २०२५ को समापन समारोह आउँदो शनिबार (३१ मे) लन्डनको ग्रीनफोर्ड हलमा आयोजना हुँदैछ। साँझ ५ बजे सुरु हुने यो भव्य समारोहका लागि अतिथि कलाकारहरू बिहीबार साँझ नै लन्डन अवतरण गरिसकेका छन्।
आयोजक संस्था थर्ड आइका अध्यक्ष विकास देवकोटाका अनुसार कार्यक्रमको सम्पूर्ण तयारी सकिएको छ। उनले समापन समारोहलाई “नेपाली सिनेमा र संस्कृतिको अन्तर्राष्ट्रिय उत्सव”को रूपमा परिभाषित गर्दै दर्शकको उल्लेखनीय उपस्थिति रहने विश्वास व्यक्त गरे।
समारोहमा सहभागी हुने पुष्टि भइसकेका प्रमुख अतिथिहरूमा वरिष्ठ अभिनेता सन्तोष पन्त, नेपाल चलचित्र विकास बोर्डका अध्यक्ष दिनेश डिसी, चर्चित नृत्यांगना आस्मा विश्वकर्मा, लोकप्रिय गायक प्रताप दास, गायिका सुवानी मोक्तान, संगीतकार सुबास भुषाल र अभिनेत्री निती शाह रहेका छन्। सबै कलाकार लन्डन आइपुगेका छन् र उनीहरू दर्शकमाझ प्रत्यक्ष प्रस्तुति तथा संवादका लागि तयारीमा छन्।
समापन समारोहमा दर्शकहरूले प्रत्यक्ष सांगीतिक, नृत्यात्मक र सांस्कृतिक प्रस्तुतिहरूको मजा लिन सक्नेछन्। साथै, फिल्म फेस्टिभलको उद्देश्यअनुसार उदीयमान कलाकारहरूलाई निर्माता तथा निर्देशकहरूसँग प्रत्यक्ष भेटघाट गर्ने अवसर पनि उपलब्ध हुनेछ।
यस वर्षको फेस्टिभलको उद्घाटन समारोह गत १९ मेमा अल्डरसटस्थित एम्पायर हलमा सम्पन्न भएको थियो, जहाँ चलचित्र ‘पुजार सार्की’ को प्रदर्शनसहित महोत्सवको औपचारिक शुभारम्भ गरिएको थियो।
३९८ वटा चलचित्रहरू विश्वभरबाट फेस्टिभलमा सहभागी हुन आवेदन दिएका थिए। तिनमध्ये उत्कृष्ट चार चलचित्रहरू पुजार सार्की, ज्वाइँसाब, सतीदेवी र हाफ जर्नी चयन गरिएका थिए, जसको विभिन्न स्थानमा प्रदर्शन गरिँदै आएको छ। समापन समारोहमा यिनै चलचित्रहरूलाई विशेष सम्मान प्रदान गरिनेछ।
फेस्टिभल आयोजनामा विकास देवकोटा, सुनिलबाबु खड्का, ओजेश सिंह, प्रजेश श्रेष्ठ, अनिल बस्नेत, सुवसिंह गुरुङ, रोमियन लिम्बु, प्रशान्त खड्का र रविन भारती लगायतको सक्रिय भूमिका रहेको छ।