लण्डन / नेपथ्य ब्यान्डले १२ वर्षपछि पुनः वेम्बली एरिनाको मञ्चमा इतिहास दोहोर्याएको छ।
हिजो साँझ, अगस्ट ९ मा, बेलायतको सुप्रसिद्ध वेम्बली एरिनामा नेपथ्यले आफ्नो बहुप्रतिक्षित प्रस्तुति दिँदै एकपटक फेरि नेपाली गीत-सङ्गीतलाई अन्तर्राष्ट्रिय स्तरमा चम्काइदिएको छ।
यो त्यही मञ्च हो, जहाँ सन् २०१3 को अगस्ट ३ मा ब्यान्डले अभूतपूर्व सफलता हासिल गरेको थियो। त्यतिबेला जस्तै, हिजो पनि हजारौं दर्शकहरूको उपस्थितिमा सभागृह गुञ्जिएको थियो। आयोजकका अनुसार यसपटक पनि करिब सात हजार दर्शक उपस्थित थिए, जुन नेपथ्यको बेलायतमा पाएको सबैभन्दा ठूलो दर्शक उपस्थिति हो।
‘वेम्बलीको प्रस्तुतिले फेरि पनि विश्वका प्रमुख सहरहरूमा हामीलाई नयाँ अवसरहरूको ढोका खोल्नेछ,’ ब्यान्डको व्यवस्थापन गर्दै आएका नेपालयका किरणकृष्ण श्रेष्ठले भने।
मुख्य गायक अमृत गुरुङले पनि हिजोको क्षणलाई जीवनको अर्को उचाइको रूपमा अनुभूत गरे। ‘त्यत्रो ठूलो दर्शकदीर्घाबाट आएको ताली र उत्साहले मलाई फेरि १२ वर्षअघिको क्षणमा पुर्याइदियो,’ उनले भावुक हुँदै भने, ‘म पुनः दर्शकसँग पूर्ण रूपमा एकाकार भएको अनुभव गरिरहेको थिएँ।’
यस पटकको वेम्बली यात्रामा अमृतसँगै ध्रुव लामा (ड्रमसेट), सुविन शाक्य (बेस गितार), नीरज गुरुङ (गितार), शान्ति रायमाझी (मादल) र दिनेशराज रेग्मी (किबोर्ड) मञ्चमा थिए। नेपालबाट १४ सदस्यीय टोली बेलायत पुगेको थियो, जसमा ६ संगीतकार र ८ प्राविधिक तथा व्यवस्थापक समावेश थिए।
वेम्बली एरिनामा कार्यक्रम ‘बीएसके इन्टरटेनमेन्ट’ र ‘पर्चा प्रोडक्सन’को संयोजनमा सम्पन्न भएको हो।
बेलायतभर बसोबास गर्ने एक लाखभन्दा बढी नेपालीहरूलाई लक्षित गर्दै, आयोजकहरूले लन्डनबाहिरका दर्शकलाई पनि सहज सहभागिताको व्यवस्था मिलाएका थिए।
स्थानीय आयोजक टोलीका दीपेन्द्र लामाले भने ‘यो प्रस्तुति बेलायतमा नेपाली संगीतको अर्को ऐतिहासिक क्षण बन्न पुग्यो,’ ।