लन्डन – नेपाल विद्युत प्राधिकरणका पूर्व कार्यकारी निर्देशक तथा ‘उज्यालो नेपाल’का नायक कुलमान घिसिङ सोमबार बेलायत आइपुगेका छन्। तमुधिं यूकेको निमन्त्रणामा उनी १६औं नेपाली मेलामा विशेष अतिथि भएर सहभागी हुने उद्देश्यले यहाँ आएका हुन्।
लन्डनको हिथ्रो विमानस्थलमा उनको स्वागत तमुधिं यूके अध्यक्ष जुमकाजी गुरुङको नेतृत्वमा गरिएको थियो। स्वागत टोलीमा उपाध्यक्ष कमल गुरुङ, महासचिव डा. विशाल गुरुङसहितका पदाधिकारी र सल्लाहकारहरू सहभागी थिए।
संस्थाका उपाध्यक्ष तथा नेपाली मेला संयोजक कमल गुरुङका अनुसार आगामी अगष्ट २४ मा हुने नेपाली मेलामा घिसिङको उपस्थिति विशेष आकर्षण हुनेछ। आगमनकै दिन बेलुकी मिचेटस्थित तमुधिं यूके भवनमा उनको सम्मानमा रात्रीभोज समेत आयोजना गरिएको छ।
बेलायतमा रहँदा घिसिङले यहाँका विभिन्न नेपाली संघसंस्था र समुदायहरूसँग भेटघाट र अन्तरक्रिया गर्ने कार्यक्रम रहेको छ। लोडसेडिङ अन्त्य गरी देशलाई उज्यालो बनाउने श्रेय पाएका घिसिङ हाल नयाँ राजनीतिक दलको तयारीमा रहेको चर्चा भइरहेको छ, जसअन्तर्गत उनले विभिन्न मुलुकस्थित नेपाली समुदायसँग भेटघाट गरिरहेका छन्।
