दिनेश कुमार परियार
लन्डन। नेपालको ऐतिहासिक नगर भक्तपुरको झल्को दिलाउने गरि लन्डनमा शनिवार बिस्का जात्रा सम्पन्न भएको भयो ।
आयोजक पासा पुचः गुथि यूकेले प्लमस्टिडस्थित एशियन कम्युनिटी सेन्टरमा जात्रा आयोजना गरेको हो । गुथिका अध्यक्ष सुशील प्रजापतिले जात्रामा उत्साहजनक सहभागिता भएको बताए ।
जात्रामा लण्डन र आसपासबाहेक केन्ट, अल्डरसट, रेडिङ, बर्मिङहम, म्यान्चेस्टरदेखि स्कटल्याण्डबाट समेत सहभागीहरु आएका थिए । उनीहरुमध्ये झण्डै आधा गैरनेवार थिए।
जात्रामा नेवार र गैरनेवार समुदायका अधिकांश सहभागीहरु मौलिक नेवारी पहिरनमा सजिएका थिए । जात्रामा परम्परागत बाजाहरु धिमे र ढाः बाजाको साथमा मौलिक भैरव, कालभैरव र ख्या नाचका दृश्य साँच्चीकै भक्तपुरकै झल्को दिलाउने खालका थिए।
जात्राको मुख्य आकर्षण बेलायतमै निर्माण गरिएका भैरवनाथ र भद्रकालीका रथहरु थिए । परम्पराअनुसार मौलिक बाजागाजा र नाचगानसहित दुवै रथहरुलाई तान्दै मैदानमा ल्याएर लिंगो उठाएपछि बिस्का जात्रा शुरु भएको थियो । त्यसपछि जात्राका सबै सहभागीलाई समे बजी बाँडिएको थियो ।
अन्त्यमा योसिंद्यो ढालेर दुवै रथलाई तीनपटक जुधाइएको थियो ।जात्रामा आयोजक गुथिका शाखाहरुसहित जम्मा ८ वटा समूहले लगातार दिनभर धिमे बाजा र ढाः बाजाको प्रस्तुति गरेका थिए। बेलायतमै जन्मिएका, यतै हुर्किएका किशोरकिशोरीहरु समेत मौलिक नेवारी बाजाहरु बजाउंदै, रम्दै गरेको निकै सुन्दर देखिन्थ्यो ।
कार्यक्रममा प्रमुख अतिथि बेलायतका लागि नेपाली राजदूत ज्ञानचन्द्र आचार्यले जात्राबाट बेलायतमा नेवारी संस्कृतिको प्रवद्र्धनमा महत्वपूर्ण योगदान पुगेको बताए ।
सो अवसरमा विशेष अतिथिहरु लन्डन ग्रीनवीच बरोका उपमेयर जीत रानाभाट र गुठी तथा सांस्कृतिक अभियन्ता गणपतिलाल श्रेष्ठले पनि शुभकामना मन्तव्य दिएका थिए। जात्रा संयोजक माधवलाल श्रेष्ठले स्वागत तथा गुथिका अध्यक्ष सुशिल प्रजापतिले धन्यवाद ज्ञापन गरेका थिए । महासचिव नगेन्द्र श्रेष्ठले कार्यक्रम सञ्चालन गरेका थिए ।
सन् २०२२ मा पहिलोपटक आयोजित लन्डन बिस्का जात्राको यो दोस्रो संस्करण थियो । जात्रा संयोजक एवम् गुथिका साउथ इष्ट शाखा अध्यक्ष माधवलाल श्रेष्ठले भविष्यमा बिस्का जात्रालाई हरेक वर्ष आयोजना गर्ने बताए ।