लन्डन — नेपाली क्रिकेट टोलीले १२ वर्षपछि स्कटल्यान्डविरुद्ध टी-२० अन्तर्राष्ट्रियमा पहिलो जित हात पार्दै ऐतिहासिक पुनरागमन गरेको छ। मंगलबार स्कटल्यान्डमै जारी त्रिकोणात्मक टी-२० अन्तर्राष्ट्रिय शृंखलामा नेपालले स्कटल्यान्डलाई २ विकेटले पराजित गरेको हो।
सन् २०१३ मा स्कटल्यान्डसँग पराजित भएपछि नेपालले यस फर्म्याटमा पुनः खेल्ने मौका पाएको थिएन। करिब एक दशकपछि पुनः भेट भएको खेलमा नेपालले स्कटल्यान्डलाई हराउँदै पुरानो हिसाब मिलाएको छ।
कम स्कोर, उच्च रोमाञ्च
टस जितेर ब्याटिङ गरेको स्कटल्यान्डले १९.४ ओभरमा सबै विकेट गुमाउँदै जम्मा ९७ रन बनायो। स्कटल्यान्डका मिचेल लिस्कले ४६ रन बनाए भने अन्य ब्याट्सम्यान नेपाली बलिङको दबाबमा लामो समय टिक्न सकेनन्।
नेपालका लागि सन्दीप लामिछाने बलिङका नायक बने। उनले ४ ओभरमा १ मेडन सहित ११ रन दिँदै ४ विकेट लिए। करण केसी र दीपेन्द्र सिंह ऐरीले २-२ विकेट र ललित राजवंशीले १ विकेट हात पारे।
कठिन लक्ष्य पछ्याउँदै संघर्षपूर्ण जित
नेपालले ९८ रनको सामान्य लक्ष्य पछ्याउने क्रममा सुरुवात राम्रै गरे तापनि खेलको अन्त्यतिर दवावमा पर्यो। ओपनर कुशल भुर्तेलले ३० रन बनाउँदै राम्रो आधार तयार पारे। तर विकेट निरन्तर खस्दा खेल रोमाञ्चक बन्दै गयो।
अन्तिम ओभरमा नेपाललाई जितका लागि ४ रन आवश्यक थियो। १९.४ ओभरमा नेपालले आठौं विकेट गुमायो। अन्तत: करण केसी र सन्दीप लामिछानेले संयमित खेल प्रदर्शन गर्दै नेपाललाई २ विकेटको कठिन जित दिलाए।
नेपालले यसअघि शृंखलाको पहिलो खेलमा नेदरल्यान्ड्ससँग तेस्रो सुपर ओभरमा हार बेहोरेको थियो।
यो खेल नेपाल र स्कटल्यान्डबीचको पहिलो टी-२० अन्तर्राष्ट्रिय खेल थियो। नेपालले सन् २०१३ मा स्कटल्यान्डसँग खेलेको टी-२० विश्वकप क्वालिफायरमा ८ विकेटले पराजय बेहोरेको थियो।
१२ वर्षपछि नेपालले त्यो हारको जवाफ जितमार्फत फर्काउन सफल भएको छ।