लन्डन — बेलायतको संसदले इंग्ल्याण्ड र वेल्समा गर्भपतन (अबोर्शन) लाई अपराध मान्ने पुरानो कानुन हटाउने प्रस्तावलाई प्रारम्भिक स्वीकृति दिएको छ। यो कानुन विक्टोरियन युग (१९ औं शताब्दी) देखि प्रचलनमा थियो, जसका कारण पछिल्ला वर्षहरुमा महिलामाथि प्रहरी अनुसन्धानको संख्या बढ्दै गएको देखिएको थियो।
हाल इंग्ल्याण्ड र वेल्समा २४ हप्तासम्मको गर्भपतन वैध मानिन्छ, तर त्यसका लागि दुई चिकित्सकको सहमति आवश्यक पर्छ। तर २४ हप्ता नाघेपछि गर्भपतन गर्ने महिलालाई अहिले पनि आपराधिक अभियोग लाग्न सक्ने व्यवस्था थियो, जसको सजाय आजीवन कैदसम्म हुन सक्थ्यो।
यद्यपि बेलायतमा यस्ता अभियोग विरलै लाग्ने गरेका छन्, कोरोना महामारीपछि घरमै गर्भपतनको औषधि प्रयोग गर्ने व्यवस्था ल्याइएपछि अभियोग र अनुसन्धानका घटना बढ्न थालेका थिए।
स्वतन्त्र मतदान प्रक्रियामा मंगलबार संसदमा उक्त प्रस्तावलाई ३७९ मतले समर्थन र १३७ मतले विरोध गर्दै प्रारम्भिक स्वीकृति दिइएको हो। यो संशोधन अनुसार अब महिलालाई जुनसुकै अवस्थामा गर्भपतन गरे पनि अपराध मानिने छैन, तर चिकित्सक वा अन्य व्यक्तिले २४ हप्ताको सीमाबाहिर गर्भपतन गराउन सहयोग गरेमा भने कानुनी कारबाहीको सम्भावना रहनेछ।
यो प्रस्ताव अझै संसदको माथिल्लो सदन (हाउस अफ लर्ड्स) बाट पास हुनुपर्ने भएकाले पूर्ण कार्यान्वयनमा आउन केही समय लाग्न सक्छ।
संशोधन प्रस्ताव गर्ने लेबर पार्टीकी सांसद टोनिया एन्टोनियाजी ले विगत पाँच वर्षमा १०० भन्दा बढी महिलामाथि अनुसन्धान गरिएको भन्दै यो कानुन महिलामाथि अन्याय भएको बताइन्। उनले भनिन्, “यी सबै घटनाहरु हाम्रो पुरानो र क्रूर कानुनका कारण भएको अन्याय हो, अब यो सकिनै पर्छ।”
सांसद एन्टोनियाजीका अनुसार कतिपय महिलाले समयपूर्व बच्चा जन्माउँदा, वा हिंसात्मक सम्बन्धका कारण गर्भपतन गराउँदा समेत प्रहरी अनुसन्धानमा पर्नु परेको थियो।
यो संशोधन व्यापक अपराध न्याय सुधार विधेयक अन्तर्गत रहेको छ, जसले यदि पारित भयो भने बेलायतको गर्भपतनसम्बन्धी कानुन फ्रान्स, क्यानडा र अष्ट्रेलियाजस्ता पश्चिमी देशहरुसँग समान स्तरमा पुर्याउनेछ।