लन्डन — बेलायतमा सक्रिय नेकपा एमालेनिकट प्रवासी नेपाली मञ्च यूके (ONF UK) ले नयाँ नेतृत्व चयन गरेको छ। लेष्टरमा सम्पन्न मञ्चको नवौं राष्ट्रिय अधिवेशनले पशुपति पोखरेललाई सर्वसम्मत रूपमा नयाँ अध्यक्ष चयन गरेको हो।
पशुपति पोखरेल मञ्चमा लामो समयदेखि क्रियाशील नेता हुन्। उपाध्यक्ष हुँदै संघसंस्था समन्वय विभाग प्रमुखको जिम्मेवारी सम्हालेका पोखरेल अब तीन वर्षका लागि अध्यक्ष बनेका छन्। अध्यक्ष पोखरेलले आफ्नो कार्यकालमा प्रवासी नेपालीहरुको हितमा सक्रिय रूपमा काम गर्ने र संगठन विस्तारलाई पहिलो प्राथमिकतामा राख्ने प्रतिबद्धता जनाएका छन्।
नवनिर्वाचित कमिटीमा चार जना उपाध्यक्ष चयन भएका छन् — प्रतिमा जिसी, डा. मुकुन्द बास्तोला, लिलामान शेरपुञ्जा पुन र सुदेशा बजगाईं।
सचिवमा गंगा क्षेत्री चयन भएका छन् भने उपसचिवमा हरि आचार्य, श्याम लुईंटेल र दुर्गा बानिया चयन भएका छन्। एक उपसचिव पछि मनोनयन गर्ने निर्णय गरिएको छ।
सदस्यहरुमा शम्भुप्रसाद अर्याल, अर्जुन चापागाईं, तारानाथ भण्डारी, अर्कराज तिम्सिना, वीरकाजी गुरुङ, अञ्जु पाठक र प्रेम गुरुङ रहेका छन्।
अधिवेशनमा नेकपा एमालेका महासचिव शंकर पोखरेलको प्रमुख आतिथ्य रहेको थियो। महासचिव पोखरेलले नयाँ नेतृत्वलाई बधाई दिँदै प्रवासी नेपालीहरुको हक अधिकारका लागि अझ सशक्त रुपमा अगाडि बढ्न आग्रह गरे। उनले एनआरएन नागरिकताको विषय चाँडै समाधान हुने प्रतिबद्धता पनि दोहोर्याए।
नयाँ नेतृत्वलाई ओएनएफ अन्तर्राष्ट्रिय कमिटीका अध्यक्ष सञ्जय थापाले शपथ ग्रहण गराएका थिए।
कृष्ण भण्डारीले सहमतिका लागि अध्यक्ष पदबाट आफ्नो दाबी फिर्ता लिएपछि पोखरेलको नेतृत्वमा सर्वसम्मत नेतृत्व चयन भएको हो।
अध्यक्ष पोखरेलले आउँदै गरेको एनआरएनए यूके निर्वाचनमा मञ्चको भूमिकालाई प्रभावकारी बनाउने घोषणा गरे। साथै, संगठन विस्तार र प्रवासी नेपालीहरुको हितका मुद्दामा अझ प्रस्ट र सक्रिय भूमिका खेल्ने बताए।