लण्डन । गैरआवासीय नेपाली संघका अध्यक्ष डा.बद्री केसीले गैरआवासीय नेपालीहरुको सम्पत्ति सम्बन्धी अधिकारबारे कानुन प्रष्ट हुनु पर्नेमा जोड दिएका छन् ।
डा. केसीले गैरआवासीय नेपाली संघ यूकेद्वारा सोमवार अल्डरशटको एम्पाएर हलमा आयोजित सार्वजनिक सुनुवाई कार्यक्रममा गैरआवासीय नेपाली नागरिकताले गैरआवासीय नेपालीहरुको सम्पत्तिको सुरक्षा गरेको बताए ।
उनले भूपूगोर्खाहरुको समान पेन्सन र अधिकारको आन्दोलनको मागलाई बेलायत र नेपालका प्रधानमन्त्रीबीच प्रत्यक्ष वार्ता मार्फत सम्बोधन गर्न माग गरे।
उनले गैरआवासीय नेपाली संघको ११ औं महाधिवेशनबाट निर्वाचित कार्यसमितिलाई सर्वोच्च अदालतको पछिल्लो फैसलाले आधिकारिक रुपमा काम गर्ने बाटो खोलिदिएको उल्लेख गरे।
कार्यक्रममा गैरआवासीय नेपाली संघका उपाध्यक्ष डा. हेमराज शर्माले गैरआवासीय नेपाली संघभित्र एकता कायम राख्न संघका सबै पूर्वअध्यक्षहरु एउटै ठाउँमा उभिन आग्रह गरे।
कार्यक्रमको प्रमुख अतिथि बेलायतका लागि कार्यवाहक राजदूत रोशन खनालले गैरआवासीय नेपाली संघ र नेपाल सरकारबीचको सहकार्यबाट मात्र देशको समृद्धि सम्भव रहेको बताइन्।
संघका उपाध्यक्ष रामशरण सिम्खडाले गैरआवासीय नेपाली संघको निर्वाचित कार्यसमितिलाई ओझेलमा पार्ने प्रयासलाई सर्वोच्च अदालतको हालैको फैसलाले असफल पारिदिएको बताए। उनले हितकाजी गुरुङ्ग अध्यक्ष रहेको गैरआवासीय नेपाली संघ यूकेनै एकमात्र आधिकारिक एनआरएनए भएको बताउँदै कुनै पनि दुविधामा नपर्न आग्रह गरे।
एनआरएनए यूकेका अध्यक्ष हितकाजी गुरुङको अध्यक्षमा अयोजित कार्यक्रममा संघकी महिला उपाध्यक्ष रोजिना प्रधान राई, गैरआवासीय नेपाली संघका सल्लाहकार सूर्य गुरुङ, संघकी सचिव टिका गुरुङ, एनआरएनए यूरोप उपसंयोजक रोर्वट लिम्बु, प्रवक्ता फडिन्द्र पन्त, एनआरएनए हङकङका अध्यक्ष गोकर्ण ढकाल, तमुधीं यूकेका अध्यक्ष हरि गुरुङ लगायतले शुभकामना मन्तव्य राखेका थिए।
महासचिव गोविन्द खरेलले संचालन गरेको सार्वजनिक सुनुवाईमा सयपत्री परिवारले सांस्कृतिक कार्यक्रम प्रस्तुत गरेको थियो।
यसैबीच
प्रेम गाहामगर अध्यक्ष रहेको एनआरएनए यूकेले , डा.बद्री केसी र लन्डनस्थित नेपाली दूतावासकी कार्यवाहक राजदूत रोशन खनाल सहभागी भएको कार्यक्रममा नाराबाजीका साथ बिरोध गर्यो ।
गाहा समर्थित युवाहरुले बेलायतका लागि समावेशी राजदूत चाहियो, बद्री केसी आइएलओमा भ्रस्टाचार गरेको पैसा फिर्ता गर, पूर्वाग्रही उपनियोग प्रमुख रोशन खनाल राजिनामा देउ लेखिएका प्लेकार्ड बोकेर नाराबाजी गरेका थिए ।
गाहामगरले आफूलाई बिना कारण दूतावासमा प्रवेश नदिइएको भन्दै कार्यवाहक राजदूत रोशन खनाल माथि रोष प्रकट गर्दै आईरहेका छन् ।