लण्डन । नेपाल पत्रकार महासंघ बेलायत शाखामा रहेको बिबादबारे स्पष्ट गर्न पत्रकारहरुले केन्द्रिय समितिसंग आग्रह गरेका छन् ।
बेलायतस्थित नेपाली पत्रकारहरुको छाता संस्था नेपाल पत्रकार महासंघमा सदस्यता वितरण तथा निर्वाचन प्रकृयाका विषयमा रहेको किचलो अन्त्य गरि महाधिवेशनको मिति तय गर्न आग्रह गरिएको हो ।
नेपाल पत्रकार महासंघको गत जेठ २३ गते ९जुन ५, २०२४० को परिपत्र अनुसार नेपाल पत्रकार महासंघ बेलायत शाखाको स्थगित अधिवेशनको नयाँ मिति तय गर्न शाखाका सदस्यहरुले माग गरेका हुन् ।
नेपाल पत्रकार महासंघ बेलायतको अधिवेशन तयारी समितिका संयोजक दिनेश परियारले नवनिर्वाचित कार्यसमितिको लागि अध्यक्ष निर्मला शर्मालाई अधिवेशनको मिति तय गर्न र केन्द्रीय प्रतिनिधि पठाउन आग्रह गरेका हुन् ।
नेपाल पत्रकार महासंघको पत्र बमोजिम महाधिवेशनमा जाने र नजाने विषयमा वेलायतस्थित पत्रकारहरु बिभाजित हुदाँ संस्थाभित्र विवाद चर्किएको थियो।
नेपाल प्रेस यूनियन बेलायतका अध्यक्ष बिपिन निरौलाले नेपाल पत्रकार महासंघ बेलायतको पूर्वकार्यसमितिसंग नेपाल प्रेस युनियन बेलायतले गरेको पूर्व सम्झौता अनुरुप शाखामा सदस्यता वितरण हुनु पर्ने माग गरे ।
उनले गत जुन महिनामा सदस्यता वितरणमा शाखामा भएको व्यापक अनियमिताको छानविन गरी तत्काल नेपाल पत्रकार महासंघ बेलायत शाखाको छौटौ महाधिवेशनको मिति तय गर्न माग गरे ।
नेपाल पत्रकार महासंघ बेलायतका पूर्वबरिष्ठ उपाध्यक्ष श्याम लुँटेलले शाखामा नयां सदस्यता वितरणको प्रकृया सुरु गरेर सबै नेपाली पत्रकारहरुलाई महासंघको छाताभित्र ल्याएर मात्र महाधिवेशन हुनु पर्ने बताए ।
लुँइटेलले समाजलाई भ्रम पार्ने गरि कथित महाधिवेशनबाट निर्वाचित फर्जी कार्यसमितिको फोटो सेसन तथा खादामाला सहितको सम्मानप्रति सचेत रहन बेलायतस्थित नेपाली समुदायलाई आग्रह गरे ।
नेपाल पत्रकार महासंघ बेलायत शाखाको सदस्यताका लागि गत जुन महिनामा ६५ जनाले आवेदन दिएकोमा तत्कालिन अध्यक्ष ध्रुर्व अर्याल समूहले एक लौटी रुपमा सदस्यता वितरण गरेको आरोप लागेको छ ।
अर्याल समूहले केन्द्रको परिपत्रलाई लत्याउँदै एकतर्फी अधिवेसन घोषणा गरेको थियो ।