फार्नब्रोमा हुने कार्यक्रम ‘म्युजिक फर युनिटी’ नाराका साथ कन्सर्ट आयोजना हुँदै
लण्डन । मगर संघ युकेको आयोजनामा आउँदो जुन १४ तारिखका दिन बेलायतको फार्नब्रोस्थित फार्नब्रो रग्बी फुटबल क्लबमा आयोजना हुने नेपाली ओपन कन्सर्ट २०२५ मा नेपालका ख्यातिप्राप्त कलाकार खेम सेन्चुरी, अन्जु पन्त र विजय ठाडा सहभागी हुने भएका छन्।
संघले कार्यक्रमको जानकारी दिन लण्डनमा आज पत्रकार सम्मेलनमा भ्वाइस अफ नेपाल सिजन ६’ का कोच खेम सेन्चुरी, सदाबहार गायिका अन्जु पन्त तथा ‘भ्वाइस अफ नेपाल सिजन ३’ का टप १२ प्रतियोगी विजय ठाडाले प्रस्तुति दिने जानकारी दिईएको हो ।
कार्यक्रममा ‘छन्। ‘म्युजिक फर युनिटी’ भन्ने नाराका साथ आयोजना हुने उक्त कार्यक्रम बिहान ११ बजेबाट बेलुकी ८ बजेसम्म सञ्चालन हुनेछ।
कार्यक्रममा बालबालिकाका लागि मनोरञ्जनात्मक खेल, युवा तथा ज्येष्ठ नागरिकहरूका लागि सांस्कृतिक प्रस्तुति, नेपाल र बेलायतका स्थानीय कलाकारहरूको नृत्य र ‘मगर गट ट्यालेन्ट’ प्रतियोगिताका विजेताहरूको विशेष प्रस्तुति समावेश गरिनेछ।
संघका अनुसार कार्यक्रमलाई सफल बनाउन युकेको १२ वटै शाखाहरूलाई सक्रिय रूपमा परिचालन गरिएको छ। कार्यक्रममा वेल्स, क्याट्रिक, मिडल्याण्ड लगायतका क्षेत्रहरूबाट सहभागीहरूको सहभागिता रहनेछ।
कार्यक्रममा बेलायतका लागि नेपाली राजदूत चन्द्रकुमार घिमिरे प्रमुख अतिथिका रूपमा उपस्थित हुने छन्। साथै, स्थानीय मेयर, उपमेयर, काउन्सिलरहरू तथा विभिन्न नेपाली संघसंस्थाका प्रतिनिधिहरू समेतको उपस्थिति रहने आयोजकले जनाएको छ।
करिब ५ हजार दर्शकहरूको उपस्थिति रहने अनुमान गरिएको यो कार्यक्रम बेलायतमा नेपाली समुदायबीच सांस्कृतिक एकता र पहिचान प्रवर्द्धन गर्ने एक विशिष्ट वार्षिक उत्सवको रूपमा स्थापित हुँदै गएको छ।
कार्यक्रमको दौरान मगर महिला संघ युकेले राफल ड्र सञ्चालन गर्नेछ, जसमा £२०० देखि £७०० सम्मका नगद पुरस्कारहरू राखिएका छन्।
मगर संघ युकेको स्थापना सन् २००२ मा भएको हो भने, सन् २००६ देखि संघले नियमित रूपमा नेपाली ओपन कन्सर्ट आयोजना गर्दै आएको छ। आयोजकका अनुसार यो कार्यक्रम बेलायतमा खुला मैदानमा सबै उमेर समूहका लागि खुल्ला ढंगले आयोजना हुने बृहत नेपाली सांस्कृतिक कार्यक्रम हो।
पत्रकार सम्मेलनमा मगर संघ युकेका अध्यक्ष लालबहादुर पुनले अध्यक्षता गरेका थिए भने महासचिव गोमानसिंह पुनले सञ्चालन गरेका थिए। कार्यक्रममा पत्रकारहरूका जिज्ञासाको उत्तर संघका वरिष्ठ उपाध्यक्ष तथा कार्यक्रम संयोजक रूद्र थापा र संघकी सांस्कृतिक सचिव नुनु पाइजाले दिएका थिए।