टोरन्टो, क्यानडा – “जातीय विभेदमुक्त विश्व” निर्माणका लागि आयोजना गरिँदै गरेको ग्लोबल सम्मेलन २०२५ को सम्पूर्ण तयारी सम्पन्न भएको आयोजक संस्थाले जनाएको छ।
क्यानडामा स्थापित सामाजिक न्यायका लागि समर्पित संस्था सहयात्रा इन्टरनेशनल एलायन्स फर सोसल जस्टिस–क्यानडा ले दक्षिण एशिया र उत्तर अमेरिकाका विभिन्न साझेदार संस्थाहरूको सहयोगमा जेठ ११ देखि १३ गतेसम्म (मे २५–२७) टोरन्टोको कन्वेन्सन सेन्टर मा भव्य सम्मेलनको आयोजना गर्न लागेको हो।
“समता, सामाजिक न्याय र जातीय विभेदको अन्त्यतर्फ ऐक्यबद्धता” भन्ने मूल नारासहितको उक्त सम्मेलनमा विभेदविरोधी विश्वव्यापी अभियानलाई थप ऊर्जा दिने लक्ष्य लिएको छ।
सम्मेलनमा नीति निर्माण गर्ने निकायका प्रतिनिधि, सरकारी अधिकारीहरू, सामाजिक अभियन्ता, अनुसन्धानकर्ता, शैक्षिक क्षेत्रका विज्ञ, विद्यार्थी, सञ्चारकर्मी तथा निजी क्षेत्रका अग्रणीहरूको सहभागिता रहनेछ।
सम्मेलनको उद्घाटन संयुक्त राष्ट्रसंघका अल्पसंख्यक मामिलाका पूर्व विशेष प्रतिनिधि प्रो. फर्नान्ड दे वारनेस ले गर्नुहुनेछ। साथै, नेपाल, अमेरिका, क्यानडा, भारत लगायत विभिन्न देशका विशिष्ट वक्ताहरूले जातीय विभेद अन्त्यका विषयमा कार्यपत्र प्रस्तुत गर्ने कार्यक्रम छ।
जम्मा १८ जना प्रमुख वक्ता र २० जना कार्यपत्र प्रस्तुतकर्ताले सहभागिता जनाउने आयोजक समितिले जनाएको छ।
यो सम्मेलनले जातीय विभेद अन्त्यका लागि विश्वभर भइरहेका प्रयासहरूलाई साझा मञ्चमा ल्याउनेछ। सम्मेलनमा सम्मेलनले सामाजिक न्याययुक्त, समावेशी र विभेदरहित समाज निर्माणका उपायहरूमा केन्द्रित हुने आयोजकहरूले जनाएका छन्।
ब्र्याम्पटनस्थित सम्मेलन केन्द्रमा आयोजना हुने कार्यक्रममा विश्वभरबाट करिब ४०० सहभागीहरूको उपस्थिति रहने अपेक्षा गरिएको छ।