लन्डन, बेलायत – पाल्पाबाट बेलायती सेनामा प्रवेश गरेर समाजसेवी र व्यवसायीको पहिचान बनाएका भूतपूर्व गोर्खा क्याप्टेन भीम सारु मगर अब बेलायतको ननिटन बेडवर्थ बरो का मेयर बनेका छन्।
बुधबार ननिटन काउन्सिल हलमा सम्पन्न वार्षिक बैठकमार्फत सारु बेलायतको स्थानीय सरकारको नेतृत्व तहमा निर्वाचित भएका हुन्। सत्तारूढ लेबर पार्टीबाट उम्मेदवारी दिएका सारुले कुल २० मत प्राप्त गर्दै मेयरको जिम्मेवारी हात पारे। उनका प्रतिस्पर्धी विल मार्कमले १५ मत प्राप्त गरे भने चार काउन्सिलर अनुपस्थित थिए।
शपथ लिएपछि सारुले भने, “नेपालको ग्रामीण भेगमा जन्मिएको सामान्य नागरिकले आज बेलायतमा मेयर बन्ने अवसर पाउनु सपनाभन्दा परको कुरा हो।” उनले आफ्नो सफलताको श्रेय बेलायती समाजको समावेशिता, अवसर र समुदायको सहयोगलाई दिएका छन्।
नेतृत्वका लागि प्रतिवद्धता
कार्यभार ग्रहण गर्दै उनले ननिटन बरोमा रहेका सबै जाति, समुदाय र वर्गलाई समेटेर समावेशी र उत्तरदायी नेतृत्व दिने प्रतिबद्धता व्यक्त गरे। “बरोका हितका लागि मेरो योजना स्पष्ट छन्—समान अवसर, सामाजिक समावेशिता, र समुदायको आवाजलाई प्राथमिकता,” उनले बताए।
बेलायतमा नेपाली समुदायको उल्लेख्य उपस्थिति रहेको उल्लेख गर्दै उनले मेयरको हैसियतमा नेपाली समुदायलाई समेत समेटेर काम गर्ने आश्वासन दिए। साथै, उनले नेपालका स्थानीय सरकारहरूसँग अनुभव साटासाट गर्न तयार रहेको उल्लेख गर्दै सहयोगको ढोका खुला रहेको बताए।
गोर्खा इतिहासमा उपलब्धि
गोर्खा भर्तीको २०८ वर्ष लामो इतिहासमा ननिटनमा पहिलोपटक एक पूर्व गोर्खा मेयर बनेको यो क्षणलाई सारुले ऐतिहासिक र गर्वको विषय माने। “यो व्यक्तिगत सफलतामात्र होइन, सम्पूर्ण नेपाली समुदाय र गोर्खा इतिहासको सम्मान हो,” उनको भनाइ थियो।
भीम सारु को हुन्?
पाल्पाको माथागढी गाउँपालिका–१ चिदिपानी चन्द्रवनमा जन्मिएका भीम सारुले सौभाग्य माविबाट प्रारम्भिक शिक्षा प्राप्त गरे। त्रिभुवन बहुमुखी क्याम्पस, पाल्पाबाट स्नातक पढ्दै गर्दा उनले सन् १९९३ मा ब्रिटिश सेनामा भर्ती भई करिब तीन दशक सेवा गरे।
सारु हाल ब्रिटिश गोर्खा भेट्रान्स एसोसिएसनका अध्यक्ष छन्। उनले रोयल इन्जिनियर्समा ग्यारिजन इन्जिनियरका रूपमा सेवा गरे। सन् २०१७ देखि उनी बेलायतमा इम्ब्रोइडरी व्यवसाय सञ्चालन गर्दै आएका छन्। समाजसेवामा समेत सक्रिय भीम सारु पछिल्लो चार वर्षदेखि स्थानीय राजनीतिमासक्रिय भएर काम गरिरहेका छन्।
उनको मेयर पदमा निर्वाचन नेपालीहरूका लागि मात्र होइन, प्रवासी समुदायको लागि पनि प्रेरणाको स्रोत बन्ने निश्चित देखिन्छ।