लन्डन – स्कटल्याण्डमा हुन गइरहेको आईसीसी एक दिवसीय विश्वकप लिग-२ सिरिजमा सहभागिता जनाउन नेपाली राष्ट्रिय क्रिकेट टोली लन्डन आइपुगेको छ।
टोलीको बिहीबार बिहान हिथ्रो विमानस्थलमा आगमन भएको हो, जहाँ माया इभेन्टस का निर्देशक राज पाण्डे लगायतको टोलीले खेलाडीहरूलाई स्वागत गरेका थिए। पाण्डेका अनुसार कप्तान रोहित पौडेल भने परीक्षा सकिएपछि आगामी मे १७ मा मात्र लन्डन आउनेछन्।
नेपालले स्कटल्याण्ड र नेदरल्याण्डसँग जुन २ देखि १० सम्म लिग-२ अन्तर्गतको सिरिज खेल्नेछ। त्यसअघि टोलीले लन्डनमा दुई दिन विश्राम गर्नेछ भने एमसीसी, कार्डिफ युनिभर्सिटी, र ग्लोस्टर का खेलाडीहरूसँग अभ्यास खेल खेल्ने कार्यक्रम रहेको छ।
अनुभवी खेलाडी ज्ञानेन्द्र मल्ल का अनुसार टोलीले नेपालमै दुई महिना लामो तयारी गरिसकेको छ र यूकेमा पनि पर्याप्त अभ्यास समय लिइएको छ। त्यस्तै, सन्दीप लामिछाने ले पनि स्कटल्याण्ड जानुअघि बेलायतमा अभ्यास गर्न पाउनु टोलीका लागि निकै सहयोगी हुने बताएका छन्।
खेलाडीहरूलाई थप सहयोग गर्न माया इभेन्टसले आगामी शनिबार लन्डनको साउथ ह्यारोस्थित नेवा छेमा मा च्यारिटी डिनरको आयोजना गर्दैछ। निर्देशक पाण्डेले उक्त डिनरमा उपस्थित भई खेलाडीहरूलाई मनोबल दिन सबैमा अपिल गरेका छन्।
नेपाली टोलीको सूची:
-
उपकप्तान: दीपेन्द्रसिंह ऐरी
-
कुशल भुर्तेल
-
आसिफ शेख (विकेटकिपर)
-
गुलशन झा
-
अनिल शाह
-
भीम सार्की
-
सोमपाल कामी
-
आरिफ शेख
-
बसिर अहमद
-
नन्दन यादव
-
रिजन ढकाल
-
ललित राजवंशी
-
सन्दीप लामिछाने
-
करण केसी
टी-२०आई सिरिजका लागि थप समावेश:
-
किरणकुमार ठगुन्ना
-
रुपेश सिंह
-
लोकेश बम
टीमले लिग-२ को अन्त्यपछि जुन १५ देखि २० सम्म स्कटल्याण्ड र नेदरल्याण्डसँग टी-२० अन्तर्राष्ट्रिय श्रृंखला पनि खेल्ने कार्यक्रम रहेको छ।