एनआरएन यूके अध्यक्ष पदमा राजेन्द्र पुडासैनीको उम्मेदवारी घोषणा

लण्डन । गैरआवासीय नेपाली संघ (एनआरएनए) यूकेको आगामी निर्वाचनमा अध्यक्ष पदका लागि राजेन्द्र पुडासैनीले औपचारिक उम्मेदवारी घोषणा गरेका छन्। आउँदो जुलाईको अन्तिम साता हुने निर्वाचनका लागि शुक्रबार साँझ जुममार्फत आयोजित पत्रकार सम्मेलनमा पुडासैनीले आफ्नो उम्मेदवारी सार्वजनिक गरेका हुन्।

एनआरएनए अन्तर्राष्ट्रिय समितिका केन्द्रीय सदस्य रहेका पुडासैनी लामो समयदेखि बेलायतमा सामाजिक, राजनीतिक र श्रमिक अधिकारका क्षेत्रमा सक्रिय रुपमा क्रियाशील छन्।

पत्रकार सम्मेलनमा उनले एनआरएन अभियानलाई अझ एकीकृत, समावेशी र जिम्मेवार बनाउन आफू अध्यक्ष पदमा उम्मेदवार बनेको स्पष्ट पारे। उनले प्रस्तुत गरेका प्रमुख एजेण्डाहरूमा:

• एकताबद्ध र सशक्त एनआरएन निर्माण,

• नेपाली नागरिकताको निरन्तरता सुनिश्चित गर्ने,

• नेपालस्थित गैरआवासीय नेपालीहरूको सम्पत्तिको संरक्षण,

• पूर्व गोर्खाहरूको समान अधिकारको पक्षमा ऐक्यबद्धता जनाउने,

• एनआरएनएमा नयाँ पुस्ताको सहभागीता अभिवृद्धि गर्ने,

• नेपाली कला, साहित्य र संस्कृतिको प्रवर्द्धन गर्ने,

• नेपाली विद्यार्थी र श्रमिकहरूको अधिकार र सुरक्षालाई मजबुत बनाउने जस्ता बुँदाहरू समावेश छन्।

बेलायतस्थित GMB National Union मा सचिव पदमा कार्यरत पुडासैनीले बेलायतमा श्रमिक हकहितको क्षेत्रमा नेतृत्वदायी भूमिका खेल्दै आएका छन्। यसअघि उनले विभिन्न सामाजिक संघसंस्थामा नेतृत्व र सल्लाहकारको भूमिका समेत सफलतापूर्वक निर्वाह गरेका छन्। उनको उम्मेदवारीसँगै एनआरएन यूकेको निर्वाचन थप प्रतिस्पर्धात्मक र चासोको केन्द्र बन्ने देखिएको छ।

को हुन् राजेन्द्र पुडासैनी?

राजेन्द्र पुडासैनी, नेपाल नुवाकोट जिल्लाको साविक जिलिङ गाउँपालिका–२ (हाल बेलकोटगढी नगरपालिका–८) निवासी स्व. उपेन्द्र पुडासैनी र लोकमाया पुडासैनीका माइलो सुपुत्र हुन्। करिब २५ वर्षअघि अध्ययनका लागि बेलायत आएका पुडासैनीले यहाँको प्रतिष्ठित विश्वविद्यालयबाट MBA र BSc (Honors) डिग्री हासिल गरेका छन्।

विगत १५ वर्षदेखि बेलायतको स्वास्थ्य सेवा क्षेत्रमा क्रियाशील रहेका पुडासैनी हाल तीन छोराका पिता र दुई नाति–नातिनाका हजुरबुवा हुन्।

विद्यार्थीकालदेखि नै सामाजिक रूपान्तरणमा सक्रिय रहेका पुडासैनी नेपालमा रहँदा सरस्वती बहुमुखी क्याम्पसको स्वतन्त्र विद्यार्थी यूनियन (स्ववियु) का सभापति समेत भइसकेका थिए। बेलायतमा आएपछि उनी ट्रेड यूनियन आन्दोलनमा अग्रपंक्तिमा रहेर काम गर्दै आएका छन्। हाल उनी GMB National Union, London Centre North का सचिव पदमा कार्यरत छन् र बेलायतमा श्रमिक अधिकारको एक सशक्त आवाजको रूपमा परिचित छन्।

सामाजिक एकता र समावेशीकरणमा विश्वास राख्ने पुडासैनीले सन् २०१४ मा London Borough of Harrow अन्तर्गत Harrow-on-the-Hill काउन्सिलर पदमा समेत उम्मेदवारी दिएका थिए। उनी राजनीति र समाजसेवामा पारदर्शिता र शुद्धिकरणका पक्षधर मानिन्छन्।

हाल पुडासैनी बेलायतको Essex स्थित Harlow मा स्थायी रूपमा बसोबास गर्दै आएका छन्। उनले यती नेपाली एशोसिएसनमा दुई कार्यकाल महासचिव, प्रनेममा अध्यक्ष, र विभिन्न सामाजिक संघसंस्थामा सल्लाहकारको भूमिका समेत निर्वाह गरिसकेका छन्।

पुडासैनी सन् २०२१–२३ मा एनआरएनए अन्तर्राष्ट्रिय समितिका सदस्य समेत थिए। नेपालमा महाभूकम्प, बाढी, पहिरो जस्ता प्राकृतिक विपत्तिका समयमा उनले बेलायती स्वास्थ्यकर्मीहरूको टोलीको नेतृत्व गर्दै राहत तथा पुनर्निर्माण कार्यमा समेत सक्रिय सहभागिता जनाएका थिए।