काठमाण्डौं | नेपाली कांग्रेसका सभापति तथा पूर्वप्रधानमन्त्री शेरबहादुर देउवाले विदेशी नागरिकता लिइसकेकाहरूलाई पुनः नेपाली नागरिकता दिन नसकिने स्पष्ट पारेका छन्।
शनिबार ललितपुरमा आयोजित ‘सुगौली सन्धि र नेपालमा नागरिकता’ पुस्तक विमोचन कार्यक्रममा बोल्दै देउवाले नेपाली नागरिकता गुमाइसकेका व्यक्तिलाई पुनः नागरिकता प्रदान गर्नु कठिन हुने बताए।
उनले भने, “अर्को देशको नागरिकता लिइसकेका व्यक्तिलाई नेपालको नागरिकता दिन गाह्रो छ। नेपाल सानो देश भएकाले यस्ता विषयमा संवेदनशील हुनुपर्छ।”
ब्रिटिश गोरखा सैनिकहरूको मागबारे उल्लेख गर्दै उनले नेपालमा नागरिकता निरन्तरता चाहने उनीहरूको भावना स्वाभाविक भए पनि कानुनी जटिलता रहेको जनाए। “विदेशी नागरिकता लिएका गोरखा सैनिकहरूलाई अन्य सुविधाहरू जस्तै एनआरएन (गैर आवासीय नेपाली) नागरिकता दिन सकिन्छ, तर नेपाली नागरिकता दिन सकिँदैन,” उनले प्रस्ट पारे।
उनले नेपाल फर्किन चाहने सबैलाई स्वागत गरिने बताए तर नागरिकताको सवालमा स्पष्ट कानुनी नीति अपनाउनु आवश्यक रहेकोमा जोड दिए।
“नागरिकताको विषयमा छलफल गर्नुपर्ने धेरै पक्षहरू छन्, तर अर्को देशको नागरिक बनिसकेकालाई नेपाली नागरिकता दिन सजिलो हुँदैन,” देउवाले दोहोर्याए।