लण्डन, – गैरआवासीय नेपाली संघ (एनआरएनए) यूकेको नयाँ कार्यकालका लागि सदस्यता आवेदन दिनेहरुको संख्या ३ हजार ५ सय १६ पुगेको छ। यो संख्या बुधबार राति ११:५९ बजेभित्र प्राप्त आवेदनको हो, जसले सदस्यता प्रक्रियामा उल्लेखनीय जनसहभागिता देखाएको छ।
एनआरएनए यूकेका अनुसार, प्राप्त आवेदनहरूमध्ये हालसम्म १ हजार ९ सय २७ जनाको सदस्यता स्वीकृत भइसकेको छ भने बाँकी १ हजार ५ सय ८९ जनाको आवेदन प्रमाणिकरण प्रक्रियामा छ। यसबाहेक, एनआरएनए एपमार्फत फारम भरिसकेर पेस नगरेका ७ सय ३० आवेदन ‘ड्राफ्ट’ अवस्थामा रहेका छन्।
यी ड्राफ्ट आवेदनहरूलाई पूर्ण गर्न संघले अतिरिक्त ४८ घण्टा समय प्रदान गरेको छ। अब ती फारमहरू २७ जुनको मध्यरातभित्र बुझाउनु पर्नेछ। यसरी फारम बुझाउँदा आवश्यक कागजातहरू—जस्तै नागरिकता, पासपोर्ट वा अन्य पहिचान प्रमाण अनिवार्य रुपमा संलग्न गर्नुपर्ने स्पष्ट गरिएको छ।
एनआरएनए यूकेका अध्यक्ष हितकाजी गुरुङ, महासचिव गोविन्द खरेल र प्रमुख निर्वाचन आयुक्त रामशरण सिम्खडाद्वारा संयुक्त रूपमा जारी सूचनामा, तोकिएको समयपछि प्राप्त सदस्यता आवेदनहरू आगामी निर्वाचनका लागि मान्य नहुने जानकारी पनि दिइएको छ।
यस पटक सदस्यता प्रक्रियामा कुनै पनि उम्मेदवार वा समूहको सक्रिय संलग्नता बिना, स्वस्फूर्त रूपमा आएको उच्च आवेदन संख्या संघको सफलता भएको एनआरएनए यूकेले बताएको छ। अघिल्लो कार्यकालमा करिब ४ हजार १ सय सदस्यता रहेको सन्दर्भमा, यस पटक पनि सदस्य संख्या त्यही हाराहारी पुग्ने अनुमान गरिएको छ।
एनआरएनए यूकेको आगामी निर्वाचन २६ जुलाई २०२५ मा अनलाइनमार्फत हुनेछ भने राष्ट्रिय महाधिवेशन २७ जुलाईमा आयोजना गरिनेछ। संघले यो प्रक्रियामा सक्रिय सहभागिता जनाउने सबैलाई धन्यवाद प्रकट गरेको छ।