लन्डन । गैरआवासीय नेपाली संघ (एनआरएनए) यूकेको निर्वाचनमा कासीराम भण्डारीको उदयले नयाँ तरंग ल्याएको छ। विशेषगरी स्कटल्याण्डबासी नेपालीहरूको साझा उम्मेदवारका रूपमा अगाडि सारिएपछि उनी चुनावी प्रतिस्पर्धामा लोकप्रिय नामका रूपमा स्थापित हुन थालेका छन्।
हाम्रो कथा जस्ता चर्चित सामाजिक मिडिया प्ल्याटफर्महरूबाट चर्चामा आएका कासीराम भण्डारी हाल स्कटल्याण्डमा बसोबास गर्दै आएका एक सक्रिय समाजसेवी हुन्। लामो समयदेखि प्रवासी नेपालीहरूको हकहितमा काम गर्दै आएका उनले सामाजिक सञ्जालमार्फत पनि ठूलो समर्थन पाएका छन्।
स्कटल्याण्डको एकताको प्रतिक बने कासीराम
एनआरएनए यूकेको आउँदो २६ जुनको अनलाइन निर्वाचनको पूर्वसन्ध्यामा, स्कटल्याण्डका नेपालीहरूबीच भण्डारीलाई साझा उम्मेदवार बनाउने सहमति भएपछि चुनावी प्रतिस्पर्धा झन् रोचक बनेको छ। यसअघि नै राजेन्द्र पुडासैनी, गोविन्द खरेल र मनिष खत्रीले उम्मेदवारी घोषणा गरिसकेका थिए।
भण्डारीले नेपालब्रिटेन डटकमसँगको कुराकानीमा स्कटल्याण्डवासीहरूको चाहना र समर्थनका आधारमा आइतवार उम्मेदवारी दर्ता गर्ने निर्णय गरेको जानकारी दिएका छन्। उनले आफ्नो औपचारिक घोषणापछि चुनावी अभियानलाई थप तिव्रता दिने बताएका छन्।
नेतृत्वको सहमति, एकताको सन्देश
स्कटल्याण्डमा अध्यक्ष पदका आकांक्षी शेर केसी र रामप्रसाद कंडेलबीच सहमति भएसँगै रामप्रसाद कंडेलले आफ्नो उम्मेदवारी फिर्ता लिँदै शेर केसीलाई समर्थन गरेका छन्। त्यसको साटोमा शेर केसीले कंडेललाई यूके एनएनसी उपाध्यक्ष पदका लागि समर्थन गर्ने सहमति भएको छ।
उक्त सहमतिपछि स्कटल्याण्डमा एकीकृत समिति गठन गर्ने तयारी गरिएको छ जसले समावेशी प्रतिनिधित्वलाई प्राथमिकता दिनेछ। यस पहलले नेपाली समुदायबीच सहकार्य र एकताको बलियो सन्देश दिएको छ।
शेर केसीले भने, “यो ऐतिहासिक समझदारी नेपाली समुदायको दीर्घकालीन हितमा छ। हामी सबै एकजुट भएर अघि बढ्नुपर्ने बेला आएको छ।”
रामप्रसाद कंडेलले पनि एकताबद्ध नेतृत्वमार्फत नेपाली आवाज अझ सशक्त बनाउने अठोट दोहोर्याए।
को हुन् कासीराम भण्डारी?
कासीराम भण्डारी स्कटल्याण्डमा बसेर लामो समयदेखि सामाजिक कार्यमा सक्रिय एक चिनिएको अनुहार हुन्। “हाम्रो कथा” लगायतका डिजिटल प्ल्याटफर्ममा उहाँको योगदान र प्रस्तुति अत्यन्त लोकप्रिय बनेको छ। समाजमा उदार विचार, मिलनसार स्वभाव र नेतृत्व क्षमताका कारण उहाँले युवा तथा बौद्धिक वर्गको मन जित्न सफल भएका छन्।
उहाँले आफ्नो उम्मेदवारीलाई व्यक्तिगत आकांक्षा नभई, समुदायको चाहना र आवाजका रूपमा प्रस्तुत गर्दै आउनुभएको छ। उहाँ भन्छन्, “अब समय हो, हामी सबै एकढिक्का भएर नयाँ इतिहास लेख्ने।”
स्कटल्याण्डको सहमति र कासीराम भण्डारीको लोकप्रियता एनआरएनए यूकेको निर्वाचनमा निर्णायक मोड बन्ने संकेत देखिएको छ।