लन्डन – गैरआवासीय नेपाली संघ (एनआरएनए) यूकेको आगामी निर्वाचनमा बेलायतमा लामो समयदेखि सामाजिक सेवामा सक्रिय रहिएकी डा. रक्षा थापा उपाध्यक्ष पदका लागि प्रतिस्पर्धामा उत्रिएकी छिन्। उनले साउथ बिहीबार साँझ ह्यारोस्थित गोल्डेनसीप रेस्टुरेन्टमा आयोजित पत्रकार सम्मेलनमार्फत आफ्नो उम्मेदवारीको औपचारिक घोषणा गरेकी हुन् ।
स्वास्थ्य तथा सामाजिक विज्ञानमा बोर्नमाउथ विश्वविद्यालयबाट विद्यावारिधि हासिल गरेकी डा.थापा मानसिक स्वास्थ्य, महिला सशक्तिकरण, अटिजम र सिकाइ चुनौती भएका व्यक्तिहरूको सेवा क्षेत्रमा लामो समयदेखि क्रियाशील रहिएकी छिन्। नेपाल र बेलायत दुवै देशमा उहाँको योगदान उल्लेखनीय छ — बालबालिका, वृद्धवृद्धा, पशु कल्याण संस्थाहरूमा नियमित सहयोगदेखि युवा खेलाडीहरूलाई शैक्षिक अवसर उपलब्ध गराउने कार्यमा उहाँको सक्रियता छ।
सशक्त महिला नेतृत्वको प्रतिबद्धता
पत्रकार सम्मेलनमा बोल्दै थापाले एनआरएनए जस्तो संस्थामा महिलाको सहभागिता मात्र होइन, नेतृत्व पनि हुनुपर्नेमा जोड दिईन्। ूमहिलाको प्रतिनिधित्व होइन, सक्रिय सहभागिता र संगठित नेतृत्व आवश्यक छ,ू उनको भनाइ थियो। शिक्षा, स्वास्थ्य र खेलकुद क्षेत्रमा बेलायत र नेपालबीच सहकार्य गर्दै दीर्घकालीन कार्यक्रम अघि बढाउनु आफ्नो मुख्य एजेन्डा भएको पनि पनि बताईन।
समर्थनमा व्यापक साथ
घोषणा कार्यक्रममा सहभागी विभिन्न संघसंस्थाका प्रतिनिधिहरूले डा. थापाको उम्मेदवारीलाई खुलेर समर्थन जनाए। यती नेपाली एसोसिएसन यूकेका पूर्व अध्यक्ष उमेशराज मोक्तानले थापालाई जिताउन पूर्ण सहयोग गर्ने प्रतिबद्धता व्यक्त गर्दै, मतदातालाई महिला नेतृत्वलाई अवसर दिन अपिल गरे।
स्लाउ नेपलिज सोसाइटी यूकेका अध्यक्ष लेखनाथ घिमिरेले एनआरएनए यूकेलाई डा. थापाले सुशासन र वित्तीय पारदर्शितामार्फत मजबुत बनाउन सक्ने विश्वास व्यक्त गरे।
सुधारको पक्षमा दृढ अडान
डा. थापाका जीवनसाथी राज पाण्डेले संस्थालाई बाहिरबाट आलोचना गरेर होइन, भित्रैबाट सुधारको बाटो अपनाउँदै अघि बढ्न सकिने विश्वासका साथ उहाँलाई उम्मेदवारीका लागि प्रोत्साहित गरेको जनाए।
सोसाइटी अफ नेपलिज प्रोफेसनल्स यूकेका अध्यक्ष गजेन कटुवालले डा. थापाको उम्मेदवारीलाई संस्थाको प्रतिष्ठा जोगाउने उपायका रूपमा हेर्नुपर्ने धारणा राखे।
नेपलिज नर्सिङ एसोसिएसन यूकेका पूर्व अध्यक्ष बिनोदविकास सिम्खडाले थापाको लिडरशिप क्षमता, सोच र अनुभवप्रति विश्वास जनाउँदै योग्य उम्मेदवार चयनको महत्त्वमा जोड दिएका थिए।
गैरआवासीय नेपाली संघ (एनआरएनए) यूकेको आगामी निर्वाचन आगामी जुलाई २६ मा हुने तय भएको छ।