ण्डन, बेलायत – गैरआवासीय नेपाली संघ (एनआरएनए) यूकेले नेपाल पत्रकार महासंघकी केन्द्रीय अध्यक्ष निर्मला शर्मालाई विशेष सम्मान गरेको छ। बुधबार नर्थ वेस्ट लन्डनमा आयोजित मिट एण्ड ग्रीट कार्यक्रममा अध्यक्ष शर्मालाई सम्मान गर्दै उनको पत्रकारितामा पुर्याएको योगदानको कदर गरिएको हो।
एनआरएनए यूकेका नवनिर्वाचित अध्यक्ष राजेन्द्र पुडासैनीले अध्यक्ष शर्मालाई दोसल्ला ओढाई सम्मान प्रदान गरे। कार्यक्रममा बोल्दै अध्यक्ष पुडासैनीले नेपाली पत्रकारितामा शर्माको दीर्घ योगदान प्रेरणादायी रहेको उल्लेख गरे।
सम्बोधनको क्रममा अध्यक्ष शर्माले गैरआवासीय नेपाली संघले विदेशमा बसोबास गर्ने नेपालीहरूलाई मातृभूमिसँग जोड्न खेलेको भूमिकाको प्रशंसा गर्दै, सूचना र प्रविधिको प्रयोगमार्फत दूरी घटाउँदै नेपाली समुदायलाई एकताबद्ध गर्न सफल भएको धारणा राखिन्। उनले सम्मानप्रति कृतज्ञता व्यक्त गर्दै एनआरएनए यूकेलाई धन्यवाद दिइन्।
साथै, उनले एनआरएनएको आन्तरिक एकता महत्वपूर्ण रहेको बताउँदै संस्थाभित्र उत्पन्न विवादहरू समाधान गर्न संस्थाभित्रै बाट पहल हुनुपर्नेमा जोड दिइन्। गैरआवासीय नेपालीहरूको मुद्दामा पत्रकारहरूको सकारात्मक भूमिका आवश्यक भएको पनि उनले स्पष्ट पारिन्।
कार्यक्रममा एनआरएनए यूकेका उपाध्यक्ष रामशरण सिमखडाले नेपाल पत्रकार महासंघसँग लामो समयदेखि रहँदै आएको सहकार्यलाई भविष्यमा अझ सशक्त बनाउने प्रतिवद्धता व्यक्त गरे। एनआरएनए यूकेका सल्लाहकार चिरञ्जीवी ढकालले पत्रकार महासंघको नेतृत्वमा महिला पुग्नु गौरवको कुरा भएको बताए।
वरिष्ठ पत्रकार सुमन खरेलले अध्यक्ष शर्माको भ्रमणले नेपाल र बेलायतका पत्रकारबीच अनुभव आदान–प्रदानको अवसर सिर्जना गरेको बताए। साथै उनले पत्रकारबीचको एकता कायम गर्न आग्रह गरे।
कार्यक्रमको सञ्चालन संघका प्रवक्ता श्याम लुइटेलले गरेका थिए भने नवनिर्वाचित उपाध्यक्ष डा. रक्षा थापाले स्वागत मन्तव्य दिँदै महिला नेतृत्वले सबैलाई उत्प्रेरित गर्ने विश्वास व्यक्त गरिन्।
कार्यक्रममा एनआरएनए यूकेका विभिन्न पदाधिकारी, पत्रकार, सामाजिक अगुवा तथा विशिष्ट व्यक्तिहरूको उल्लेखनीय उपस्थिति थियो।