फेल्थाम, लण्डन – बेलायतमा बसोबास गर्ने गुल्मी जिल्लाबासीहरुको साझा संस्था गुल्मी जिल्ला समाज यूके द्वारा आयोजित १७ औं वार्षिक भेटघाट भव्य सांस्कृतिक कार्यक्रमको रुपमा सम्पन्न भएको छ। अगस्ट ३, आइतबारका दिन लन्डनको फेल्थामस्थित ट्युडोर पार्क मैदानमा आयोजित यस भेला कार्यक्रममा हजारौं नेपालीको उत्साहजनक उपस्थिति रह्यो।
कार्यक्रममा विशेष आकर्षणको रुपमा नेपाली पन्जेबाजामा आधारित गुल्मेली नौमती बाजा को प्रत्यक्ष प्रस्तुति रहेको थियो। नेपालबाट आएका कलाकारहरूको सशक्त सांस्कृतिक प्रस्तुति – सोरठी, सराय, घाँटु नाच, तीज गीत, भजन, झ्याउरे, ठाडो भाका र सालैजोले उपस्थित दर्शकलाई झुमाएको थियो।
कार्यक्रमको औपचारिक उद्घाटन समाजका अध्यक्ष रुद्र थापा को अध्यक्षतामा भयो भने प्रमुख अतिथि नेपाली दूतावास लण्डनका उपनियोग प्रमुख विपिन दवाडी ले गुल्मेलीहरुको एकता, ऊर्जा र परोपकारी सोचको प्रशंसा गर्दै गुल्मीलाई नेपालको कला-संस्कृतिको अग्रणी केन्द्रको रुपमा चित्रण गरे।
अध्यात्मिक ऊर्जा प्रवाह गर्ने उद्देश्यले माता राधिका दाशी ले श्लोक र प्रवचन मार्फत मन्तव्य दिइन्। कालीगण्डकी गाउँपालिका प्रमुख वेदबहादुर थापा ले कार्यक्रमले नेपाली संस्कृति र एकताको प्रतिनिधित्व गरेको बताए भने संस्थापक अध्यक्ष ओम प्रकाश थापा काउछा ले संस्था गुल्मेलीहरुलाई दुःख-सुखमा साथ दिने सशक्त मञ्च बनेकोमा गर्व व्यक्त गरे।
कार्यक्रम संयोजक क्याप्टेन ताम ढेगा ले सांस्कृतिक प्रस्तुति, व्यवस्थापन र क्याटरिङ टिमलाई धन्यवाद दिँदै कार्यक्रम अत्यन्त सफल र मनोरञ्जनपूर्ण भएको बताए।
महासचिव महालाल घिमिरे को संचालनमा कार्यक्रम सञ्चालन भएको थियो, जहाँ उपाध्यक्ष मन्जु भण्डारी र सल्लाहकार केशब भण्डारी ले सबैलाई स्वागत गरे।
दोस्रो चरणको सांस्कृतिक कार्यक्रमको संयोजन दीपक मैथाने मगर ले गरेका थिए।
कार्यक्रममा परिकारको विशेष स्वादसमेत जोडिएको थियो – रारा रेस्टुरेन्ट द्वारा उपलब्ध जलेबी, चटपटे र बार्बिक्यूसहितको तीन कोर्स खाना सहभागीहरुको मन जित्न सफल भयो।
कार्यक्रमको अन्त्यतिर पूर्व अध्यक्ष बीर बलामी को संयोजनमा सुनका गरगहना पुरस्कारसहितको राफल ड्र आकर्षणको केन्द्र बन्यो।
सांस्कृतिक जगेर्ना, मनोरञ्जन र आपसी सम्बन्ध विस्तारको साझा थलो बनेको यो समर पिकनिक शैलीको कार्यक्रम बेलायतमा रहेका नेपालीहरुमाझ एक प्रतीक्षित वार्षिक पर्वको रुपमा स्थापित हुँदै गएको छ। सन् २००७ मा स्थापना भएको गुल्मी जिल्ला समाज यूके ले बेलायतमै होइन, नेपालमा पनि थुप्रै परोपकारी कार्य गर्दै आएको छ, जसले संस्थालाई उदाहरणीय सामाजिक अभियानको रुपमा चिनाएको छ।