लन्डन — नेपाल पत्रकार महासंघ (एफएनजे) यूकेको १४औं स्थापना दिवस तथा वार्षिकोत्सव आईतवार अल्डरसटको एम्पायर हलमा सम्पन्न भयो।
कार्यक्रमको औपचारिक उद्घाटन महासंघकी केन्द्रीय अध्यक्ष निर्मला शर्मा र बेलायतस्थित नेपाली राजदूत चन्द्र घिमिरेले संयुक्त रूपमा गरेका थिए ।
शर्माले बेलायतमा रहेका नेपाली पत्रकारहरुले आफनो नियमित काम बाहेक पनि पत्रकारितामा संलग्न भएकोमा प्रशंसा गरिन् ।
महासंघकी केन्द्रीय अध्यक्ष निर्मला शर्माले बेलायतको आन्तरिक विवाद मिलाउन भन्दै गत साता बरिष्ठ पत्रकार भगीरथ योगी संयोजक रहेको पूर्व अध्यक्षहरु सम्मिलित समिति गठन गरेकी थिईन् ।
कार्यक्रममा उनले पत्रकारहरुबीच रहेको बिबादबारे भने केही बोलिनन् ।
संस्थाका अधिकांश संस्थापक सदस्य, पूर्वअध्यक्षहरू र असन्तुष्ट धारका पत्रकारहरू भने अनुपस्थित रहे ।
वार्षिक साधारणसभाले संस्थाको आर्थिक तथा वार्षिक प्रतिवेदनलाई सर्वसम्मत रूपमा पारित गरेको जनाएको छ। सो अवसरमा वरिष्ठ पत्रकार खगेन्द्र नेपालीलाई “एफएनजे यूके पत्रकारिता सम्मान” प्रदान गरिएको थियो।
कार्यक्रममा गैरआवासीय नेपाली संघ यूकेका अध्यक्ष राजेन्द्र पुडासैनीसहित विभिन्न संघसंस्थाका प्रतिनिधिहरू उपस्थिति रहे ।
जुलाई १० मा बार्षिकोत्सव भए पनि संस्थाको आन्तरिक कारणले कार्यक्रम सारिएको थियो ।
नेपाल प्रेस युनियन यूकेको शाखाले यस पटकको कार्यक्रमलाई एकपक्षीय भन्दै बहिष्कार गरेको थियो । युनियनका अध्यक्ष बिपिन निरौलाले विज्ञप्ति जारी गरी एकल निर्णयमा कार्यक्रम गर्नु दुर्भाग्यपूर्ण भएको जनाएका थिए ।