दयाहाङ राई ‘राईमाईला’ बेलायत आउँदै

लण्डन / अन्तर्राष्ट्रिय स्तरमा चर्चित नेपाली चलचित्र ‘गाँउ आएको बाटो’ बेलायतमा प्रर्दशन हुने भएको छ ।

चर्चित अभिनेता दयाहाङ राई अर्थात फिल्मका मुख्य पात्र ‘राईमाईला’को उपस्थितिमा फिल्मको प्रिमियर हुन लागेको हो ।

आयोजक गोर्खा वारियर र ताप्लेजुंग युथ सोसाईटी सो फिल्मको प्रिमियर यही जुन महिनाको २९मा सिनेवर्ल्ड अल्र्डशट र जुन ३०मा आशफोर्डको पिक्चरहाउसमा हुने जानकारी दिएका हुन ।

नवीन सुब्बा निर्देशित चलचित्र ‘गाउँ आएको बाटो’ राई समुदायमा आधारित छ । ग्रामीण क्षेत्रमा भएको सडक विस्तारले राई समुदायको जीवनशैली र संस्कृतिमाथि पारेको प्रभावलाई चित्रण गरिएको छ ।चलचित्रको कथा महेश राईले लेखेका हुन् भने आमोद राईको लगानी छ । चलचित्रमा दयाहाङ राई, पशुपति राई र प्रशन राईको मुख्य भूमिका छ ।

अन्तर्राष्ट्रिय फेस्टिभलमा समेत प्रदर्शन भइसकेको यो चलचित्र क्यानडाको टोरोन्टो फिल्म फेस्टिभल, दक्षिण कोरियाको बुसान, ब्राजिलको साउपाउलो, भारतको मुम्बईलगायत विभिन्न देशका डेढ दर्जन महोत्सवमा छनोट भएको दाबी निर्माण टिमले गरेको छ ।