लन्डन। आइतबार लन्डनस्थित केम्पटन पार्क रेसकोर्स नेपाली संस्कृतिको रंगमा रंगिएको थियो। बेलायतमा रहेका ४४ भन्दा बढी नेपाली संघ–संस्थाले प्रस्तुत गरेका झाँकी र नृत्यले स्थललाई ‘मिनी नेपाल’मा बदलिदियो।
नेपालका विभिन्न जातजाति र समुदायले आफ्ना मौलिक भेषभूषा, परम्परा र संस्कृतिको प्रदर्शन गर्दा हजारौं दर्शक मन्त्रमुग्ध बने। तमुहरूको ट्होटे, नेवारहरूको गाइजात्रा (सापारु), धिमे बाजा, लिम्बुहरूको हाक्पारे र धान नाच, किरात राईहरूको साकेला, मगरहरूको कौरा, सारंगा, मारुनी लगायतका नृत्य मेलाका प्रमुख आकर्षण बने।
झाँकीमा परम्परागत उपकरणदेखि धार्मिक–सांस्कृतिक प्रतीक सम्म सजाएर प्रस्तुत गरिएको थियो। पासा पुचः गुथिको ४० सदस्यीय धिमे नाचले विशेष ध्यान खिच्यो भने बालबालिकाद्वारा प्रस्तुत सारंगी–मादल तालले दर्शकको मन जित्यो।
करीब दश हजार भन्दा बढी आगन्तुकले मेलामा नेपाली खानपिन, च्यारिटी र व्यापारिक स्टल (७५ वटा) मा रमाइलो गर्दै सांस्कृतिक कार्यक्रम अवलोकन गरे। कार्यक्रममा बेलायतका नेपाली मात्र नभई विभिन्न देशका कूटनीतिज्ञ तथा दक्षिण–उत्तर कोरियाली प्रतिनिधिहरूसमेत सहभागी थिए।
आयोजक तमुधिं यूकेले आयोजना गरेको १६औं नेपाली मेलामा झाँकी र नृत्य प्रतियोगितासमेत समावेश थियो।
-
झाँकीतर्फ मगर संघ यूके प्रथम, पासा पुचः गुथि यूके दोस्रो र किरात याक्थुङ चुम्लुङ यूके तृतीय भए।
-
नृत्यतर्फ पासा पुचः गुथि यूके प्रथम, तनहुँ समाज यूके दोस्रो र किरात याक्थुङ चुम्लुङ यूके तृतीय बने।
निर्णायक मण्डलमा साहित्यकार, पत्रकार, कलाकार तथा कोरियोग्राफरको सहभागिता थियो।
कार्यक्रमका प्रमुख अतिथि, बेलायतका लागि नेपाली राजदूत चन्द्रकुमार घिमिरेले २००९ देखि सुरु भएको नेपाली मेलाले यूकेमा बस्ने नेपालीको पहिचान र एकतालाई झनै सुदृढ पारेको बताए। उनले बेलायतमा रहेका नेपालीलाई कम्तीमा तीन जना बेलायतीलाई नेपाल भ्रमणमा लैजान आग्रह गर्दै नेपाल आर्थिक समृद्धिको बाटोमा अघि बढिरहेको स्मरण गराए।
‘उज्यालो नेपाल अभियान’का अभियन्ता तथा नेपाल विद्युत प्राधिकरणका पूर्व कार्यकारी निर्देशक कुलमान घिसिङले विदेशमा नेपालीले कला, संस्कृति र भेषभूषासहित आफ्नो पहिचान जोगाइरहेको देख्दा गर्व लागेको बताए। उनले ‘एक पटकको नेपाली सधैं नेपाली’ भन्ने मूल मन्त्र दोहोर्याउँदै वंशजको नागरिकताका लागि समर्थन जनाए।
सो अवसरमा विभिन्न क्षेत्रमा योगदान पु¥याएका व्यक्तित्वलाई सम्मान गरिएको थियो। कार्यक्रममा गण्डकी प्रदेश सांसद बेदप्रसाद गुरुङ, खेलाडी सरिना रानी घले र संगम गुरुङ, कोरियोग्राफर कविता घर्ती मगर गुरुङ, गोर्खा मिडिया लगायतलाई खादा, फेटा र प्रमाणपत्रद्वारा सम्मान गरियो।
मेलाको औपचारिक उद्घाटन मैनबत्ती बालेर गरिएको थियो भने सांस्कृतिक कार्यक्रम नेपाली कलाकारहरूको सहभागितामा सम्पन्न भयो। कार्यक्रममा अतिथिलाई गोर्खा प्यालेस रेष्टुरेन्टले नेपाली परिकार पस्किएको थियो।
१६औं संस्करणसम्म आइपुग्दा लन्डनको नेपाली मेला यूकेमै नेपाली कला, संस्कृति र परम्परा देखाउने सबैभन्दा ठूलो र व्यवस्थित सांस्कृतिक मञ्चका रूपमा स्थापित भएको आयोजक तमुधिं यूके अध्यक्ष जुमकाजी गुरुङले बताए।
