लन्डन । बेलायतस्थित नेपाली समुदायका १० जना व्यक्तित्वलाई वर्ष व्यक्तित्व २०२५ को उपाधि प्रदान गरिएको छ। नेपालब्रिटेन डट कमले आइतबार लन्डनस्थित स्ट्यानवेल कम्युनिटी हलमा आयोजना गरेको १८औं वार्षिकोत्सवको अवसरमा उनीहरूलाई सम्मान गरिएको हो।
कार्यक्रमका प्रमुख अतिथि, बेलायतका लागि नेपाली राजदूत चन्द्र घिमिरेले सम्मानपत्र तथा चिनो हस्तान्तरण गर्दै समुदायका योगदानकर्ता नेपालीहरूलाई बधाई तथा शुभकामना दिएका थिए।
आयोजक संस्थाका अनुसार बेलायतमा विभिन्न क्षेत्रमा सक्रिय रहँदै समाजमा विशेष योगदान पुर्याएका व्यक्तित्वहरूलाई यसपटक चयन गरिएको हो।
सम्मानित व्यक्तित्वहरू
१. रुवी राउत – पाँचथरकी उद्यमी, ‘वुका’ ब्रान्डमार्फत महिनावारी स्वास्थ्यमा विश्वव्यापी योगदान।
२. डा. बिशाल गुरुङ – एनआरएनए यूकेका स्वास्थ्य संयोजक, निःशुल्क स्वास्थ्य शिविर र नेपालमा मोतिबिन्दु शल्यक्रियामा संलग्न।
३. विकास नेपाल – नेपाल फुड्सका संस्थापक, नेपाली मःम र बियरलाई ग्रेट टेस्ट अवार्ड २०२५ जिताउँदै नेपाली स्वादलाई विश्वमा चिनाउने।
४. सुनिलबाबु खड्का – एनआरएन यूकेका पूर्वअध्यक्ष तथा सामाजिक अभियन्ता, शिक्षा र समाजसेवामा निरन्तर संलग्न।
५. दिवाकर पाण्डे – एनआरएनए स्कटल्यान्ड अध्यक्ष, नेपाली मेलादेखि घुम्ती सेवासम्म नेतृत्वदायी योगदान।
६. महेश अधिकारी – पिटरबरो नेपाली समाजका पूर्वअध्यक्ष, ९९ वर्षे लिजमार्फत भवन प्राप्त गराउन सफल समाजसेवी।
७. पुरन गिरी – सफल उद्यमी तथा अन्तर्राष्ट्रिय पर्वत समाजका संस्थापक, व्यावसायिक सफलता र सामाजिक सेवामा सन्तुलित।
८. डा. रक्षा थापा – महिला सशक्तिकरण, मानसिक स्वास्थ्य र शिक्षा क्षेत्रमा सक्रिय; हाल एनआरएनए यूकेकी उपाध्यक्ष।
९. रण बहादुर खाती क्षेत्री – लामो समयदेखि सामाजिक सेवामा समर्पित, गुल्मी तथा नेपालका अन्य क्षेत्रमा च्यारिटीमार्फत सहयोग।
१०. डा. दिलिसा सिम्खडा – दोस्रो पुस्ताकी नेपाली युवती, बेलायतमा मानसिक स्वास्थ्य क्षेत्रमा उल्लेखनीय उपलब्धि हासिल गरेकी।