काठमाडौं । फागुन शुक्ल पूर्णिमाका अवसरमा नेपालभर तथा बेलायतस्थित नेपाली समुदायले रंगहरुको पर्व होली हर्षोल्लासका साथ मनाएका छन्।
नेपालमा हिमाली तथा पहाडी भूभागमा मंगलबार र तराई क्षेत्रमा बुधबार होली मनाइयो। राजधानी काठमाडौं, पोखरा, धरान, चितवन लगायतका प्रमुख सहरहरूमा होली मनाउनेहरुको उत्साहजनक भीड देखिएको थियो। स्थानीय बासिन्दासँगै विदेशी पर्यटकहरुले पनि रंग, अबीर तथा पानी छ्यापाछ्याप गर्दै रमाइलो गरेका थिए।
त्यस्तै, बेलायतका विभिन्न सहरहरूमा रहेका नेपाली समुदायले पनि सांस्कृतिक कार्यक्रमसहित होली मनाएका छन्। लन्डन, अल्डरसट, म्यानचेस्टर, फोकस्टोन लगायत स्थानहरूमा विशेष कार्यक्रम आयोजना गरिएको थियो। नेपाली संघसंस्थाहरूले सामूहिक भेला, सांगीतिक प्रस्तुति तथा परम्परागत शैलीमा रंग खेल्दै होली मनाएका थिए।
नेपाल तथा विदेशमा रहेका नेपालीहरूबीच होलीले आपसी मेलमिलाप, सद्भाव र एकताको सन्देश फैलाएको छ।