लन्डन – बेलायत सरकारले विभिन्न भिसा श्रेणीको आवेदन शुल्कमा वृद्धि गरेको छ, जुन आगामी अप्रिल ९ देखि लागू हुनेछ। नयाँ शुल्क संरचना अनुसार विद्यार्थी, पर्यटक तथा कामदार भिसाका दरहरूमा उल्लेखनीय वृद्धि गरिएको छ।
विद्यार्थी भिसामा ७ प्रतिशत वृद्धि
नयाँ दर अनुसार, विद्यार्थी भिसा आवेदन शुल्क ४९० पाउन्डबाट ५२४ पाउन्ड (७ प्रतिशत वृद्धि) पुर्याइएको छ। त्यस्तै, ६ देखि ११ महिनासम्मको छोटो अवधिको अंग्रेजी भाषा पाठ्यक्रम अध्ययन गर्न चाहने विद्यार्थीका लागि भिसा शुल्क २१४ पाउन्ड कायम गरिएको छ, जुन पहिलाको तुलनामा १४ पाउन्ड बढी हो।
पर्यटक भिसा महँगो, ६ महिनाको लागि १२७ पाउन्ड
भिजिटर भिसाको शुल्क १० प्रतिशतले वृद्धि गरिएको छ। अब ६ महिनाको भिजिट भिसाको लागि १२७ पाउन्ड तिर्नुपर्नेछ, जुन अघिल्लो शुल्क ११५ पाउन्डको तुलनामा १२ पाउन्ड बढी हो।
लामो अवधि भिजिटर भिसा शुल्क:
-
२ वर्षको लागि: ४७५ पाउन्ड
-
५ वर्षको लागि: ८४८ पाउन्ड
-
१० वर्षको लागि: १,०५९ पाउन्ड
कामदार भिसा पनि महँगो
बेलायतको वर्क रुट भिसामा पनि वृद्धि भएको छ।
-
३ वर्षसम्मको वर्क भिसा: ७१९ पाउन्डबाट ७६९ पाउन्ड
-
३ वर्षभन्दा बढी अवधिको वर्क भिसा: १,४२० पाउन्डबाट १,५१९ पाउन्ड
त्यस्तै, इनोभेटर फाउन्डर भिसा १,२७४ पाउन्डमा कायम गरिएको छ, जुन अघिल्लो भन्दा ८३ पाउन्ड महँगो हो। टियर १ इन्भेष्टर भिसाको शुल्क २,००० पाउन्ड पुर्याइएको छ, जुन १,१६० पाउन्डको तुलनामा उल्लेखनीय वृद्धि हो।
सेटलमेन्ट भिसा शुल्कमा पनि वृद्धि
-
आश्रित आफन्तका लागि सेटलमेन्ट भिसा: ३,२५० बाट बढेर ३,४१३ पाउन्ड
-
आर्म्ड फोर्सेस रुट सेटलमेन्ट भिसा: ३,०२९ पाउन्ड
तर, बेलायत सरकारले भिसा आवेदनका लागि उपलब्ध प्रिमियम सेवाहरूको शुल्क भने यथावत् राखेको छ।
-
प्रायोरिटी सेवा: ५०० पाउन्ड
-
सुपर प्रायोरिटी सेवा: १,००० पाउन्ड
यस शुल्क वृद्धिले विद्यार्थी, पर्यटक तथा कामदारका लागि थप आर्थिक भार पार्ने अनुमान गरिएको छ।