लन्डन, यूके – नेपालका नवनियुक्त बेलायतस्थित राजदूत चन्द्रकुमार घिमिरेले बिहीबार बकिङ्घम दरबारमा आयोजित विशेष समारोहमा राजा चार्ल्स तृतीयलाई आफ्नो ओहोदाको प्रमाणपत्र औपचारिक रूपमा बुझाएका छन्।
कार्यक्रमका क्रममा राजदूत घिमिरेले नेपालका राष्ट्रपति रामचन्द्र पौडेल र प्रधानमन्त्री केपी शर्मा ओलीको शुभकामना सन्देश राजा चार्ल्सलाई सुनाए। उनले नेपालको तर्फबाट राजाको दीर्घायु, व्यक्तिगत समृद्धि तथा बेलायती जनताको निरन्तर प्रगतिका लागि शुभकामना व्यक्त गरे।
राजा चार्ल्सले राजदूत घिमिरेलाई नियुक्तिप्रति बधाई दिँदै नेपाल–बेलायत सम्बन्धलाई अझ प्रगाढ बनाउने ब्रिटिश प्रतिबद्धता व्यक्त गरे। उनले सन् १८१६ मा सुरुआत भएको नेपाल–बेलायतको २०९ वर्षे कूटनीतिक सम्बन्धको स्मरण गर्दै नेपालको विकास प्राथमिकताहरूमा बेलायतको साथ रहने विश्वास दिलाए। साथै, उनले नेपालको सुन्दरता र आफ्ना अविस्मरणीय नेपाल भ्रमणका क्षणहरूलाई पनि सम्झिए।
राजदूत घिमिरेले दुई देशबीचको ऐतिहासिक मित्रताको प्रशंसा गर्दै बेलायतको निरन्तर सहयोगप्रति आभार प्रकट गरे। साथै, पारस्परिक हितमा केन्द्रित सहकार्यलाई अझ सशक्त बनाउने नेपाल सरकारको अडान दोहोर्याए।
यस ओहोदाको प्रमाणपत्र हस्तान्तरणसँगै राजदूत घिमिरेको बेलायतमा औपचारिक कूटनीतिक कार्यकाल सुरु भएको हो। सन् १९३४ मा स्थापना भएको लन्डनस्थित नेपाली कूटनीतिक मिसन यता घिमिरे बेलायतका लागि २३ औं नेपाली राजदूत हुन्।