लन्डन, जुलाई २६ – गैरआवासीय नेपाली संघ (एनआरएनए) यूकेको अध्यक्ष पदमा राजेन्द्र पुडासैनी निर्वाचित भएका छन्। शनिबार सम्पन्न निर्वाचनमा उनले १४८२ मत प्राप्त गर्दै आफ्ना प्रतिस्पर्धीहरूलाई पराजित गरे।
निकटतम प्रतिद्वन्द्वी गोविन्द खरेलले ९७९ मत ल्याए भने तेस्रो उम्मेदवार मनिष खरेलले ४९६ मत प्राप्त गरे।
खुला उपाध्यक्षमा उज्ज्वल कार्कीले १८८४ र डा रक्षा थापाले १७२७ मत पाएर विजयी भए । शम्भु अर्याल र ज्ञानेन्द्र आलेले क्रमश: ११९६ र ९६१ मत पाएर उपविजेता बने ।
स्कटल्यान्डबाट प्रतिनिधित्व गर्ने उपाध्यक्षमा रामप्रसाद कंडेल १६०८ प्राप्त गर्दै विजयी बने । शशी कार्की ११७४ मतसहित उपविजेता बने ।
महासचिवमा विजयी दिवाकर पाण्डेले १६६० मत पाए भने उपविजेता पुण्य रेग्मीले १२०१ पाए ।
खुला सचिवमा डिएन खराल १८७९ र कृष्ण देवकोटा २३०९ मतसहित विजयी बने भने भूपाल कार्की १३५६ मतसहित उपविजेता बने ।
आइसीसी सदस्यमा विष्णु खरेल २३२५, तुंगभद्र भुषाल २२०७ र छविलाल अर्याल २०१५ मत ल्याएर विजयी भए । देउमान इजम १८५३ मत ल्याएर उपविजेता बने ।
इंग्ल्यान्ड राज्य परिषद अध्यक्षमा राममाया विष्ट थापाले १०६९ मत पाएर विजयी हुँदा अहिल्या कुंवर ३ सय ४४ मतसहित उपविजेता भए ।
राजेन्द्र पुडासैनी
नुवाकोट जिल्लाको हालको बेलकोटगढी नगरपालिका–८ निवासी पुडासैनी, स्वर्गीय उपेन्द्र पुडासैनी र लोकमाया पुडासैनीका जेठा सुपुत्र हुन्। करिब २५ वर्षअघि अध्ययनका लागि बेलायत आएका उनी विगत १५ वर्षदेखि बेलायतको राष्ट्रिय स्वास्थ्य सेवा (NHS) मा कार्यरत छन्।
शिक्षामा उच्च उपलब्धि हासिल गरेका पुडासैनीले बेलायतकै एक प्रतिष्ठित विश्वविद्यालयबाट एमबीए र बीएससी अनर्स डिग्री प्राप्त गरेका छन्। नेपालमा विद्यार्थी राजनीतिमा सक्रिय रहँदै उनले सरस्वती बहुमुखी क्याम्पसमा स्वतन्त्र विद्यार्थी युनियन (स्ववियु) का अध्यक्षको भूमिका निभाएका थिए।
बेलायतमा बसोबास गर्दै आएका पुडासैनी त्यहाँको ट्रेड युनियन आन्दोलनमा पनि उल्लेखनीय रूपमा सक्रिय छन्। हाल उनी “जीएमबी नेशनल युनियन” अन्तर्गत लन्डन सेन्टर नर्थ शाखाका सचिव छन्।
एनआरएनए यूकेको वर्तमान नेतृत्व सम्हाल्नु अघि उनले यती नेपाली एसोसिएसन यूकेको दुई कार्यकाल महासचिवका रूपमा, प्रवासी नेपाली मञ्च बेलायतको अध्यक्ष तथा विभिन्न संस्थाहरूमा सल्लाहकारका रूपमा योगदान दिइसकेका छन्। साथै, २०२१–२३ का लागि एनआरएनए अन्तर्राष्ट्रिय समन्वय परिषद्मा सदस्य समेत रहेका थिए।