न्युयोर्क / डउफिन काउन्टीमा बसोबास गर्दै आएका एक भूटानी शरणार्थी, जो यस वर्षको सुरुमा अमेरिका बाट निर्वासित भएका थिए, नेपालमा पक्राउ परेको डउफिन काउन्टी कमिश्नर जस्टिन डग्लसले जानकारी दिएका छन्।
डग्लसका अनुसार, भारतको नयाँ दिल्ली हुँदै भूटान पठाइएका १० जना भूटानी शरणार्थीमध्ये केही डउफिन काउन्टी निवासी पनि थिए। अमेरिकामा पुनःस्थापित भएका १० शरणार्थीलाई निर्वासन गरिएको छ, साथै थप आठ शरणार्थी पनि निर्वासित भएको विश्वास डग्लसले व्यक्त गरेका छन्।
निर्वासित भएका व्यक्तिहरूलाई भारतको एउटा सहरमा लगिएको थियो, जहाँबाट उनीहरू नेपाल प्रवेश गरी शरणार्थी शिविरमा रहेका आफन्त भेट्न गएका थिए। नेपाल प्रवेश गर्ने क्रममा कम्तीमा चार जना पक्राउ परेका छन्, जसमा डउफिन काउन्टीका एक जना व्यक्ति पनि छन्।
हालसम्म १४ जना निर्वासित शरणार्थीहरूको कुनै अत्तोपत्तो छैन भने पेन्सिल्भेनियाका भूटानी नेपाली समुदायका कम्तीमा ९ जना अमेरिकी आप्रवासन तथा भन्सार प्रवर्तन (ICE) द्वारा नियन्त्रणमा रहेको डग्लसले जानकारी दिएका छन्।