टेथबरीकी एलिस बोडेनले नेपालमा रहेको ६,११९ मिटर अग्लो लोबुचे इस्ट हिमाल सफलतापूर्वक आरोहण गर्दै क्यान्सर रिसर्च यूकेका लागि £१३,००० संकलन गरेकी छन्।
क्यान्सरको उपचारपछि केही महिनामै पूर्ण रूपमा निको भएको खबर पाएसँगै उनले यो साहसिक यात्रा सुरु गरेकी थिइन्।
एलिसले भनिन्: “नेपाल साँच्चै सुन्दर देश हो — यहाँका मान्छे, संस्कृति र हिमाल तथा प्राकृतिक दृश्यहरूले बाहिर रहन मन पराउने हामीलाई आकर्षित गर्छ।”
“चढाइ मैले सोचेभन्दा गाह्रो रहेछ — उचाइमा कुनै पनि शारीरिक काम गर्न झनै कठिन हुन्छ, हरेक पाइला चाल्नै मेहनत गर्नुपर्छ।”
“हामी अत्यन्तै बिस्तारै अघि बढ्थ्यौं, कहिलेकाहीँ तीन पाइला हिँडेर फेरी लामो सास फेर्न रोकिन्थ्यो।”
१२ दिनको यो पदयात्रा खुम्बु उपत्यकाबाट सुरु भएको थियो, जसमा उचाइसँग अनुकूल हुनका लागि छोटो यात्राहरू र अन्तिम आरोहणअघि उच्च शिविरमा तीन दिनको प्राविधिक तालिम पनि समावेश थियो।
दुई अनुभवी पर्वतारोहीहरूद्वारा निर्देशित टोलीले बिहान २ बजे शिखरतर्फ यात्रा सुरु गर्यो र सात घण्टापछि शिखरमा पुगे।
एलिसले शिखरलाई ‘स्वर्ग’ भनेर वर्णन गर्दै वरपरका हिमालहरूको मनमोहक दृश्यको बर्णन गरिन्। उनले भनिन्: “हामी भाग्यमानी थियौं, त्यो बेला शिखरमा हामी मात्र थियौं। त्यसैले हामीले आरामसँग दृश्य अवलोकन गर्दै चढाइको अनुभवमा रमाउन समय लिन सक्यौं।”
यो साहसिक यात्रा उनको क्यान्सर रिसर्च यूकेका लागि रकम संकलन गर्ने अभियानको एक हिस्सा थियो। सन् २०१९ मा क्यान्सर पत्ता लागेपछि यो संस्था उनको मनको निकट विषय बन्यो। शल्यक्रिया र किमो-रेडियोथेरापीपछि सन् २०२४ को फेब्रुअरीमा चिकित्सकहरूले उनलाई पूर्ण रूपमा निको भएको जानकारी दिएका थिए।
उनले भनिन्: “यो यात्रा मेरो तर्फबाट केही फिर्ता दिने माध्यम थियो।” “म प्रत्येक दिन पाएको उपचारका लागि आभारी छु।”
“क्यान्सर रिसर्च यूकेका लागि रकम संकलन गर्नु भनेको अरूलाई पनि उनीहरूको संघर्षमा साथ दिनु हो।” क्यान्सर रिसर्च यूकेकी ग्लोसेस्टरशायर क्षेत्रकी प्रवक्ता एलिसा मिचेलले एलिसको प्रयासको प्रशंसा गरिन्।
उनले भनिन्: “एलिसले क्यान्सर रिसर्च यूकेप्रति देखाएको प्रतिबद्धताका लागि हामी हार्दिक धन्यवाद दिन चाहन्छौं।”
“उनीजस्तो समर्थकहरूको योगदानकै कारण क्यान्सर रिसर्च यूकेले पछिल्ला ५० वर्षमा बेलायतमा क्यान्सरबाट बच्ने दर दोब्बर बनाउन सफल भएको हो।”